140'554 persunas èn immigradas l'onn passà en Svizra, quai èn be 467 u 0,3% dapli che l'onn avant. Var dus terzs dals immigrants derivan da pajais da l'UE e da l'EFTA, scriva il Secretariat da stadi per la migraziun SEM. L'emigraziun è entant sa reducida lev il 2019. Uschia ha la Svizra dumbrà la fin da l'onn var 55'000 esters ed estras dapli ch'il 2018.
Sut il stritg 55'000
Il saldo da migraziun è tar 55'0017 persunas. Quai correspunda a 0,5% dapli persunas cumpareglià cun la fin da l'onn 2018. En emprima lignia haja quest augment da far cun las lubientschas per forzas da lavur da la Rumenia e la Bulgaria, scriva il SEM. Quels pajais pon profitar dapi zercladur da la libra circulaziun da persunas.
Raschun principala per l'immigraziun resta la lavur. Radund 78% da las persunas da l'Uniun europeica u da stadis dad EFTA, èn immigrads per pudair lavurar. 23% da quels han lavurà en il sectur da cussegliaziun ed informatica, 22% lavuran en la gastronomia, 15% en l'industria ed il sectur da construcziun. Il dumber da lavurers da l'exteriur è creschì cumpareglià cun il 2018 per 1,9%.
Radund 30% entras reuniun da la famiglia
La reuniun da la famiglia ha fatg or il 2019 radund 29% da l'immigraziun per la dimora a lunga vista. En quest rom èn 40'197 persunas immigradas en Svizra. 20% èn stads parents d'in Svizzer u ina Svizra.
La fin da december 2019 han total 2'111'412 esters ed estras vivì en Svizra. Da quai è la gronda part da l'Italia, suandà da la Germania, Portugal, Frantscha ed il Cosovo.
Ord l'archiv:
L'emigraziun e l'immigraziun en ed ord las valladas grischunas è gia stà baud in tema:
RTR novitads 16:00