In zic dapli che la mesadad (53,3%) dals daners ch'in perchasa ha gì a disposiziun l'onn 2015, han ils Svizzers investì per rauba e per pajar servetschs. Latiers fan ils custs d'abitar e d'energia cun 1'460 francs ora ina gronda part.
557 francs per divertiment, recreaziun e cultura
In post impurtant è tenor l'enquista da l'Uffizi federal da statistica las expensas per divertiment, recreaziun e cultura. Da quella summa vegnan 103 francs investi en il sport u la recreaziun. Visitas da concert, kino, teater u museums e la concessiun da radio e televisiun custan en media 82 francs al mais.
Ulteriurs posts impurtants per il consum èn il transport cun passa 7% dal budget e radund 6% per mangiativas e bavrondas senza alcohol.
5,9% da las entradas bruttas per expensas obligatoricas
La taglia, contribuziuns dad AVS e da cassa da pensiun sco era las premias da la cassa da malsauns obligatorica han custà ad in perchasa svizzer l'onn 2015 en media 2'990 francs al mais. La taglia ha muntà en media 1'208 francs al mais.
Con resta per spargnar?
Suenter tut las expensas è en media ina summa da 1388 francs restada per metter da la vart. Quai èn 14% da las entradas bruttas. Ils perchasas cun entradas bruttas pli bassas che 5'000 francs n'han plitost betg pudì metter da la vart daners l'onn 2015.
Betg tut ils perchasas han savì disponer da 6'957 francs al mais: L'onn 2015 han 61% da las chasadas gì a disposiziun pli pauc che quella summa media.
RR novitads 12:00