Siglir tar il cuntegn
cuntegn

Svizra 6 blessads d'explosiun a Zermatt

Ils blessads da l'explosiun da gas sajan vegnids transportads en ils ospitals da Sion e Visp. Il fieu saja sut controlla. Per la populaziun na dettia nagin privel. Tar ils blessads sa tracti da lavurers dal Grand Hotel Zermatterhof, nua che l'accident è capità.

Purtret dal Zermatterhof cun in band da segirezza davantvart.
Legenda: En la cuschina dal Zermatterhof hai dà l'explosiun da gas. Keystone

Quant grev che las persunas èn blessadas n'ha il pledader da la Matterhorn Group betg pudì dir sin la dumonda da l'Agentura da novitads svizra. Els vegnan tractads da medis locals a Sion e Visp.

Giasts n'hai gì nagins en l'hotel. L'affar è serrà pervi da la stagiun bassa. Il fieu hajan ils pumpiers gì svelt sut controlla. Radund 40 pumpiers, dus helicopters e duas ambulanzas èn stadas al lieu. La populaziun è tenor indicaziuns da la Polizia chantunala dal Vallais betg stada en privel.

Pertge ch'i ha dà l'explosiun en la cuschina da l'hotel n'è il mument anc betg cler.

RR novitads 17:00