Tenor la lescha dal parlament ha mintga parlamentari svizzer la pussaivladad da surdar 2 chartas d'admissiun en la Chasa federala. Quai ha dà da discutar ils davos dis pervia dal cas enturn la Cussegliera naziunala Christa Markwalder e l'agentura da PR Burson-Marsteller.
Ils badges na dovri betg - di Martin Schmid
Il Cusseglier dals chantuns Martin Schmid ha desistì da surdar sias chartas d'admissiun. Betg perquai ch'el fiss encunter lobbying, mabain pertge che mintgin possia s'inscuntrar cun ils parlamentaris durant las sessiuns era senza talas chartas. En pli haja quai oz memia blera glieud en la chombra avant la chombra dal Cussegl dals chantuns, ha Schmid declerà.
Chartas ad organisaziuns, agenturas e collavuraturs persunals
Tut auter han decidì ils 5 Cussegliers naziunals ed il segund Cusseglier dals chantuns, Martin Engler. Els han tuts surdà lur badges.
Tge che croda en egl è che Heinz Brand ha surdà sias chartas a collavuraturs persunals. In badge ha Beda Egger, anteriur collavuratur da l'Uffizi da migraziun grischun survegnì, l'auter la directura da Santésuisse, Verena Nold Rebetez. Ad ella avess Brand era pudì registrar sco represchentanta da Santésuisse. Sin il formular n'haja quai dentant betg dà ina gronda schelta dad inditgar quai, ha Brand declerà.
Josias Gasser ha surdà in da ses 2 badges a l'agentura da marketing Pluswert GmbH che porscha tranter auter era lobbying. Da congualar quella cun l'agentura internaziunala ch'era vegnida en las lingias grassas ils davos dis saja dentant fauss, ha el ditg sin dumonda. I sa tractia d'ina agentura da Cuira che s'occupia cun temas sco energia, traffic ed agricultura. Cun temas damai che sajan era ses temas.
Cussegliers naziunals e lur lobbyists
Heinz Brand (PPS) | - Beda Egger, collavuratur persunal - Verena Nold Rebetez, collavuratura persunala |
Martin Candinas (PCD) | - Christoph Hans, Hotelleriesuisse - Matthias Dietrich, Posta |
Josias Gasser (PVL) | - Christof Dietler, Pluswert GmbH - Peter Schuhmacher, GEO Consulting Group AG |
Hansjörg Hassler (PBD) | - Martin Rufer, Uniun purila svizra - Martin Andreas Senn, Uniun svizra dals impressaris |
Silva Semadeni (PS) | - Marcus Ulber, Pro Natura - Marcel Liner, Pro Natura |
Cussegliers dals chantuns e lur lobbyists
Stefan Engler (PCD) | - Fadri Ramming, Conferenza da las regenzas dals chantuns alpins - Thomas Egger, Gruppa svizra per las regiuns da muntognas |
Martin Schmid (PLD) | - Naginas accreditaziuns spezialas |