Siglir tar il cuntegn
Inhalt

Svizra 6% dals pazients s'infecteschan en ospital

En Svizra endiran 6% dals pazients in'infecziun durant lur dimora en l'ospital. Quai mussa in'examinaziun d'ina gruppa d'experts en 96 ospitals.

Purtret da l'entrada d'in ospital.
Legenda: 6% da pazients s'infecteschan durant lur dimora en in ospital. Keystone

Cun questa procentuala è la Svizra en la media europeica davart las infecziuns en ospitals. Quai è da leger en il bulletin actual da l'Uffizi federal da sanadad. Il pli savens datti infecziuns da plajas suenter in'operaziun. Sco segund bler datti infecziuns da las vias respiratoricas. Spezialmain pertutgads d'infecziuns sajan pazients pli vegls.

Ospitals gronds pli pertutgads

Ospitals gronds èn pertutgads pli ferm da talas infecziuns ch'ospitals pitschens u mesauns. La raschun saja che persunas ospitalisadas en instituziuns pli grondas sajan per regla pli malsauns, ed ospitals gronds fetschian operaziuns cun dapli ristgs.

Cun agid da las datas duain ils ospitals survegnir la pussaivladad d'analisar ils resultats, e da reagir nua ch'i è necessari. Cun la strategia naziunala da survegliar, prevegnir e cumbatter talas infecziuns vulan chantuns, ospitals e chasas da tgira meglierar il standard d'igiena, rinforzar la prevenziun e sustegnair la furmaziun e la perscrutaziun.

RR novitads 12:00