La regenza svizra ha deliberà il sboz per endrizzar il fond dal traffic d'agglomeraziun e da vias naziunalas (NAF). Quest fond duai finanziar il manaschi, il mantegniment e la finiziun da la rait da vias naziunalas sco era divers projects dal traffic d'agglomeraziun.
La funtauna la pli impurtanta dal fond è il supplement per la taglia sin il petroli. Oriundamain ha il Cussegl federal vulì auzar la taxa da 30 sin 45 rp. per liter, quai avess purtà radund 683 milliuns francs ad onn. Suenter la critica en la consultaziun duai quest supplement vegnir augmentà sco emprim sulet per 6 rp. L'auzament duai ir en vigur pir cura ch'ils daners vegnan duvrads, probabel il 2018.
En il fond flessegian dentant era ils daners da la vendita da la vignetta (320 milliuns francs) sco era las entradas da la taglia d'import sin autos (375 milliuns francs). Vitiers vul il Cussegl federal stgaffir ina taxa per automobils electrics che duai procurar davent l'onn 2020 per ulteriuras entradas en il fond.
Lobbi d'auto è grittentada
Las propostas dal Cussegl federal per emplenir il fond da vias naziunalas n'èn betg fairas e pauc persistentas. Uschia reageschan las organisaziuns d'automobilists. L'ACS per exempel pretenda medemas schanzas per la via sco per la rodaglia. Ord vista dal Club d'automobils Svizzer èn gia oz avant maun ils meds finanzials per las vias. Las taxas dals automobilists saja da duvrar consequentamain sulet per las vias. Quai pretenda era l'iniziativa da la "vatga da latg" ch'è vegnida inoltrada il mars avant in onn dals importaders d'autos e camiuns auto-schweiz.
Organisaziuns d'ambient èn trumpadas
Trumpà sa mussa il club da traffic svizzer VCS. Il Cussegl federal gaja en schanuglas avant la lobbi dals automobilists. En questa furma haja la fatschenta sulet ina consequenza: dapli traffic e dapli colonnas en las agglomeraziuns.
RR novitads 11:30 / 14:00