Siglir tar il cuntegn
cuntegn

Svizra 7% pli pauc traffic da rauba sin binaris

En Sviza èsi vegnì transportà l'onn passà damain rauba cun la viafier. Cumpareglià cun l'onn avant èn quests transports sa reducids per 7%. Ils transports sin via percunter èn creschids per 1,5%. Quai resulta da las novas cifras da l'Uffizi federal da statistica.

Purtret da vaguns da traffic da rauba sin binaris.
Legenda: Il traffic da rauba sin ils binaris è sa reducì per 7%. Keystone

L'onn 2017 ha la prestaziun da transports sin vias e binaris svizzers muntà a 27,3 tonnas per kilometer distanza. Cumpareglià cun l'onn avant è quai ina sminuziun dad 1,8%. Il minus total è surtut dad attribuir al grond minus tar il traffic da rauba sin binaris. La cumpart dals transports sin via munta a 63%, quella dals binaris a 37%. Cunquai han ils binaris pers 2% da la cumpart cumpareglià cun l'onn avant.

Raschun per sminuziun è l'interrupziun a Rastatt

La sminuziun da la prestaziun tar ils binaris per 7% è suandada suenter quatter onns da carschen. Il traffic da transit è stà pertutgà il pli ferm cun 8,3%. La raschun haja probabel da far cun l'interrupziun da la lingia da viafier en Germania a Rastatt, uschia l'uffizi. La lingia è stada serrada dals 12 d'avust fin il 1. d'october dal 2017. Ils binaris sin la lingia frequentada fitg ferm eran sa sbassads, suenter che aua e terra eran culads en in tunnel che vegniva bajegià sutvart.

RR novitads 10:00