Siglir tar il cuntegn

Header

Ils dus iniziants: Jack Rollan e Roger Nordmann
Legenda: Ils dus iniziants: Jack Rollan (san.) e Roger Nordmann (dretg). Keystone
cuntegn

Svizra 70 onns Chadaina da Fortuna

Il 1946 ha tut cumenzà. Jack Rollan e Roger Nordman han gì l’idea da pudair gidar a glieud en paupradad, quai cun agid da la solidaritad da tuts. Tge che ha cumenzà sco emissiun da radio è daventà ina istorgia da success 70 onns pli tard.

Il temp cura che tut ha cumenzà, il 1946, curt suenter la segunda guerra mundiala, n'era betg simpel. Ils dus moderaturs dal Radio Losanna (pli tard Radio da la Svizra Franzosa) han gì l’idea da metter sin maisa problems en Svizra e da tschertgar agid via radio. L'emprim han ins cunzunt cumenzà a rimnar resti, mangiativas u er rauba da la vita da mintgadi. L’emissiun da radio «Chaine de Bonheur» ha gì grond success uschia che las localitads da Radio Losanna eran spertamain plainas cun material. Perquai han ins stuì midar concept e mo pli rimnar raps.

Sin via di in u l'auter anc oz a mai Mr. Glückskette.
Autur: Roland JeanneretLa vusch da la Chadaina da Fortuna durant dus decennis.
Roland Jeanneret - dus decennis è el stà la fatscha da la Chadaina da Fortuna en la Svizra Tudestga.
Legenda: Roland Jeanneret - dus decennis è el stà la fatscha da la Chadaina da Fortuna en la Svizra Tudestga. MAD

Roland Jeanneret e stà durant dus decennis la vusch da la Chadaina da Fortuna en Svizra Tudestga. Durant quest temp è el vegni a savair bleras bellas istorgias via telefon da donaziuns, dentant era istorgias tristas han commuventà el.

Il Grischun è fitg generus – sch’ins po crair a la statistica

En il Grischun abitan 2,5% da la populaziun Svizra. En media rimna la centrala da telefon a Cuira dentant 5% da tut las donaziuns naziunalas.

La centrala da telefon rumantscha a Cuira na piglia natiralmain betg mo encunter telefons rumantschs mabain ils telefons da l'entir Grischun. Uschia pon ins dir ch’ils Grischuns e las Grischunas èn en media fitg generus ils dis da donaziun da la Chadaina da Fortuna.

Davart ils motivs po la directura dad RTR e presidenta da la Chadaina da Fortuna, Ladina Heimgartner, be specular. Ella suppona dentant ch'ils Rumantschs èn sco minoritad sensibilisads da gidar in l’auter e quai sa mussia lura era tar dis da rimnar.

25 onns centrala da telefon en Chasa RTR a Cuira

Lezza giada èsi stà ina idea da Roland Jeanneret, la vusch da la Chadaina da Fortuna da la Svizra Tudestga, dad er integrar la Svizra Rumantscha. Uschia hai dà l’emprima centrala da telefon per donaziuns a Cuira il 1991.

L’emprima coordinatura per questa centrala è stada Maria Cadruvi. Ad ella è cunzunt restà en memoria il grond engaschament da Roland Jeanneret sco era las differentas bellas istorgias da donaziuns. Per Maria Cadruvi eri gia lura cler che la Chadaina da Fortuna vegn ad avair grond success.

70 onns Chadaina da Fortuna – ed anc ditg betg a fin

Dapi l'emprima emissiun da Radio Losanna hai dà bleras midadas. E midadas vegn ins tenor il directur da la Chadaina da Fortuna Toni Burgener er a stuair far il futur. Cunzunt las tecnologias occupan actualmain. Uschia vegn ins en il futur a stuair dar dapli paisa sin pussaivladads da pudair far donaziuns via telefonin e computer enstagl da la donaziun tradiziunala via telefon. Qua saja la Chadaina da Fortuna sin buna via, manegia Burgener. Aifer ils ultims onns han ins realisà differents meds da pudair far donaziuns online. Uschia per exempel via applicaziun. Tar l’ultim di da donaziuns èn 20% da las donaziuns vegnidas fatgas online.

RR Actualitad 07:00

Artitgels legids il pli savens

Ir a sanester Ir a dretg