Siglir tar il cuntegn

Header

cuntegn

Svizra 80% dals giuvenils Svizzers dovran l'internet a moda raschunaivla

Ils auters mussan in cumportament da ristg u problematic pertutgant l'internet. Problematic vul dir ch'els han per exempel sintoms da privaziun sch'els èn offline u ch'els perdan la controlla cura ch'els èn en l'internet, uschia in rapport da la ZHAW, la Scol'auta da Turitg per scienzas applitgadas.

Il rapport da la ZHAW sa basa sin ina retschertga cun passa 1’000 giuvenils ch’è vegnida fatga per incumbensa da Swisscom. 80% dals giuvenils tranter 12 e 19 onns van enturn a moda raschunaivla cun l'internet. 12% mussan in sa cuntegnair «ristgà» e 9% perfin «problematic». Plinavant mussa il studi che giuvenils che sa cuntegnan a moda problematica guardan era dapli televisiun u giogan pli savens gieus da video. Els repartian plinavant er pli savens violenza mediala u èn gia sezs stads unfrendas da cybermobbing.

Emprender d'ir enturn cun conflicts «offline»

Interessantamain mussa il studi dentant che giuvenils periclitads d'esser dependents n'èn betg pli pauc activs en il temp liber. Er els s'entaupan cun amis e fan sport. Impurtant saja dentant da proteger quests uffants d'in sa cuntegnair problematic online, scrivan ils perscrutaders.

Sco exempel per tals facturs da protecziun vegn numnà da far musica, zambregiar, dissegnar, tgirar animals da chasa u era leger gasettas e magazins. Geniturs duain promover activitads nua ch'ils giuvenils sa sentan cumpetents e vegnan renconuschids e nua ch'els pon avair success.

Sur tut sch'i na giaja betg gist bain en la vita «reala», possian «likes» en raits socialas u puncts en gieus online esser fitg attractivs. Cun activitads offline pudessan ils uffants emprender d'ir enturn cun disditgas a moda suverana e da betg cumpensar schlets sentiments cun consumar medias.

Geniturs sco mals exempels

Il rapport mussa er ch'il dumber d'apparats da medias ha ina grond'influenza sin il sa cuntegnair online. Daplirs apparats cun internet che giaschan enturn a chasa e pli grond ch'il privel da vegnir dependent è. Fitg periclità èn sur tut giuvenils che guardan bler films sin il telefonin, fotografeschan u filmeschan sezs.

Ils experts cusseglian perquai adina als geniturs da metter si reglas cun ils uffants, co ir enturn cun ils apparats a disposiziun. Quai gia avant che ir per in smartphone u in tablet.

Ina giada dapli demussan ils perscrutaders quant impurtant ch'il sa cuntegnair dals geniturs sco exempel è en la situaziun. Uffants e giuvenils miran giu bler dapli dals geniturs che quai che lezs realiseschan. I rendia perquai da reflectar l'agen diever da medias u da dumandar ils uffants co quels piglian vair quel.

RR novitads 15:00

Artitgels legids il pli savens