Ils victurs: Verds, Verdliberals e PLD
Cumpareglià cun lur resultats dal 2015 avessan trais partidas gudagnà dapli electurs: Ils Verds, ils Verdliberals e la PLD. Ils liberal-democrats vegnissan da nov sin 17,1%. Ils Verds avessan quasi puspè pudì far bun quai ch’els avevan pers il 2015. Actualmain vegnissan els sin 8,1%. Ed er ils Verdliberals avessan fatg 0,8% dapli cumpareglià cun il 2015.
Ils perdents: PBD, PPS, PCD e PS
Tar ils perdents per encunter tutgass la PBD. Cumpareglià cun il 2015 perdess ella vinavant e vegniss uss mo anc tar 3,4%. La PPS restass bain vinavant la pli ferma partida, stuess però prender encunter ina perdita da 0,7%. Er la PS perdess tenor il barometer d’elecziuns 1,1%. Er la PCD n’avess betg pudì nudar ina midada dal trend e vegniss suenter las perditas actualmain anc sin 10,9%.
87% elegessan oz tuttina
Gudogns e perditas sa resultan per l’ina d'effect da mobilisaziun, per l’autra da midadas da partidas. Tenor la retschertga elegessan oz 87% la medema partida sco tar las ultimas elecziuns dal Cussegl naziunal. La maioritad restass uschia fidaivla a lur partida.
37% inditgeschan, ch’els sajan anc adina «fitg cuntents» cun lur decisiun da lura. 47% èn anc adina «plitost cuntents». 11% «deploreschan in zic» lur decisiun e 4% èn fitg malcuntents cun quai ch’els han decis il 2015.
Verds gudognan electurs sin donn e cust da la PS
Passa la mesadad da las midadas da partida stattan en connex cun dus facturs: 29% han midà partida perquai che la situaziun dals problems saja sa midada dapi il 2015 e medemamain per 29% na represchentia la partida veglia betg pli la tenuta dals electurs. La PS perdess surtut electurs als Verds ed a las partidas pitschnas da la sanestra.
Tgi che tematisescha problems novs survegn electurs novs
Ils Verdliberals e la PLD gudagnassan electurs perquai che questas partidas s’avischinan pli fitg a tschertas gruppas electoralas. Anc pli fitg vala quai per la PCD: La nova lingia burgais-sociala dals cristiandemocrats attirass blers electurs novs.
A medem temp perdess la PCD però anteriurs electurs da tschep. Quai betg pervia da la nova lingia, ma perquai ch’ella na tematiseschia betg avunda ils novs problems.
La migraziun – il problem il pli urgent
Sin plazza in da la glista dals problems che fan ils pli gronds quitads als electurs è la migraziun, quai cun 21%. Sin plazza dus suonda la politica da sanadad, sin plazza trais la prevenziun da la vegliadetgna. Suenter che la revisiun ha danovamain fatg naufragi fan blers electurs quitads co ch’i duair ir vinavant cun l’AVS.
Ambient, energia ed il clima èn medemamain temas che fatschentan. Cumpareglià cun il 2015 èn ils quitads creschids. Qua pudess er la crudada da crappa a Bondo u il hurican «Irma» avair giugà ina rolla.
Betg uschè gronds èn per encunter ils quitads da perder la lavur. Be gist 8% inditgeschan il martgà da lavur sco pli grond quità.
La retschertga represchentativa da la SSR è vegnida fatga tranter ils 28 da settember ed ils 2 d’october. Tut en tut èn 14’063 persunas sa participadas a quella.