Siglir tar il cuntegn

Header

cuntegn

Svizra 90% dals Svizzers vivan en la vegliadetgna anc a chasa

La gronda part da la glieud sur 65 onns vivan anc a chasa. Il mument èn quai passà 90% dals 1,4 milliuns seniors en Svizra. Fin il 2030 vegnia il dumber a crescher sin 2,2, milliuns, uschia la Pro Senectute. Quest trend mainia a dapli custs per la tgira a chasa e muntia ch’i dovria novs servetschs.

Ils custs per ils seniors che vegnan tgirads a chasa vegnian a crescher ils proxims onns per passa 3 milliardas francs. Quai mussia il studi «Emprim agil – lura fragil» ch’ella haja laschà far da l’Universitad da Son Gagl, uschia la Pro Senectute. Tenor stimaziuns conservativas creschian ils custs dad oz 7,2 milliardas sin 10,5 milliardas francs l’onn 2030. Tar la tgira staziunara vegnan ils custs a crescher per 1 milliarda sin 4,4 milliardas francs.

Grondas sfidas

Werner Schärer, il directur da la Pro Senectute, concluda: «Las sfidas en la tgira ambulanta èn fitg grondas en Svizra. Noss studi mussa dentant ch’i manca la purschida per il sustegn a chasa e las ideas tge purschidas che ston vegnir sviluppadas en l’avegnir.»

Las calculaziuns mussian era ch’ils custs per la tgira a chasa da persunas attempadas vegnia a crescher per 45% fin l’onn 2030. Ils custs vegnian per gronda part finanziads privat u grazia a l’agid informal e gratuit dals parents.

I dovra ponderaziuns fundamentalas

Werner Schärer è perquai da l’avis: «Per pudair cuntanscher e sustegnair er en l’avegnir ils seniors che vivan a chasa, dovri ulteriuras purschidas e ponderaziuns fundamentalas co finanziar quest basegn.»

Artitgels legids il pli savens