Siglir tar il cuntegn
Inhalt

Svizra 99% dals giuvenils han in telefonin

Quai mussa il studi da la Scola auta turitgaisa per scienzas applitgadas ZHAW ch'examinescha il diever da medias da giuvenils.

Giuvenils cun telefonin en in bus u tram.
Legenda: En media passentan giuvenils 150 minutas per di vi dal handy. Keystone

2 uras e 30 minutas èn giuvenils mintgadi vi dal telefonin. Quai mussa il studi da la ZHAW ch'examinescha il diever da medias da giuvenils. Il studi mussa era che 99% dals giuvens tranter 12 e 19 onns han in telefonin. E quels dovran il telefonin surtut per communitgar in cun l'auter. E quai capita il pli savens sur las medias socialas Instagram, Whats App u Snapchat. Facebook vegn be anc duvrà da mintga tschintgavel giuvenil.

Giuvenils èn sensibilisads

Cun excepziun da la communicaziun èn ils giuvenils però plitost passivs en las medias socialas. Damain che la mesadad dad els metta atgnas fotografias, videos u texts sin las plattafurmas. Tenor il studi èn ils giuvenils sensibilisads, tge che pertutga las medias socialas: trais quarts d'els dattan liber lur cuntegns mo a tschertas persunas.

Servetschs da streaming èn populars

Plinavant mussa il studi che servetschs da streaming sco Netflix u Spotify vegnan adina pli populars tar ils giuvens e las giuvnas. In terz dals giuvenils dispona d'in tal account. E passa la mesadad da las chasadas cun giuvenils han abunà in tal servetsch.

Per il studi èn vegnids dumandads passa 1'000 giuvenils tranter 12 e 19 onns en Svizra.

RR novitads 12:00