Siglir tar il cuntegn

Header

video
Corona è tema da conflict en il conturn privat
Or da Telesguard dals 29.10.2021.
abspielen. Laufzeit 2 minutas 43 Sekunden.
cuntegn

9avla retschertga sotomo Tema da conflicts en la societad crescha

La libertad restrenschida è anc adina il pli grond quità da la populaziun svizra. Durant che questa tema è sa reducida è la tema da conflicts en in conturn privat creschì marcantamain.

audio
Dapli conflicts en la societad pervia da la pandemia
aus Actualitad vom 29.10.2021.
abspielen. Laufzeit 4 minutas 2 Sekunden.

Dapi il fanadur è il dumber da persunas che fan quitads per restricziuns en la libertad sa reducì da 56 sin 49%, resta dentant anc adina la pli gronda tema persunala. Creschì percunter, e quai marcantamain, è la tema da conflicts en il conturn privat. Il fanadur eran quai anc 24% dals dumandads, uss gia 45% da la populaziun.

La populaziun resenta l'atmosfera pli e pli agressiva. Ils mais passads èn las discussiuns enturn la pandemia ed il cumbat cunter corona cuntinuadamain vegnì pli furius. La dumonda co ir enturn cun la pandemia e las vaccinaziuns porschan savens conflicts.
Actualmain inditgeschan set da diesch persunas dumandadas ch'i sajan sezs stads involvids en tals conflicts. Tschintg da diesch han gì conflicts en il rom privat e 3 da 10 han perfin rut giu contacts.

Prontadad per la laschar vaccinar s'augmentada

Plinavant mussa la retschertga da Sotomo che la prontadad da sa laschar vaccinar è creschida. Eran quai il fanadur anc 60% da las persunas creschidas, è il dumber en la retschertga da l'october s'augmentà sin 74%. Questa cifra resulta sin basa da las persunas ch'han inditgà ch'i hajan survegnì almain ina virola cunter corona. La gronda part da las persunas dumandadas il fanadur che han ditg ch'i veglian spetgar èn oz vaccinadas. Per augmentar questa quota spetgian ins uss da pudair persvader las persunas ch'èn s'exprimidas cunter la virola.

grafica
Legenda: Dumonda: Essas Vus gia vaccinada u Vulais as vaccinar? RTR Grafica

Passa trais quarts da las persunas ch'èn sa decididas cunter sa laschar vaccinar teman donns da sanadad, quai èn medem blers che din ch'i sajan sauns e possedian avunda forzas defensivas.

grafica
Legenda: Dumonda: Tge èn ils motivs per betg sa laschar vaccinar? (pliras propostas pussaivlas) RTR Grafica

La maioritad da las persunas che spetgan giu u che na vulan betg sa laschar vaccinar dian ch'i na vegnian betg a midar l'opiniun. Prest trais quarts sclaudan quai categoricamain, in 5avel pensa ch'igl è pauc probabel.
In motiv per sa tuttina laschar vaccinar pudess esser la fidanza en la virola e per l'autra la circumstanza ch'il mintgadi pudess vegnir memia stentus senza certificat da Covid.
Oravant tut giuvens èn da l'avis ch'il mintgadi senza certificat vegn memia stentus, dentant er ils custs per tests.

grafica
Legenda: Dumonda: Tge pudess esser la raschun per ina decisiun per la vaccinaziun? Be persunas ch'èn actualmain cunter la vaccinaziun u spetgan, ma sclaudan betg cumplainamain. RTR Grafica

Detagls da l'enquista

Avrir la box Serrar la box

L'enquista ha l'institut da perscrutaziun Sotomo fatg sin incumbensa da la SRG SSR e quai tranter ils 20 ed ils 25 d'october. En total èn 59'402 persunas sa participadas (42'493 en Svizra tudestga, 15'038 en Svizra franzosa e 1871 en Svizra taliana).

La quota da sbagl è tar +/- 1,1 puncts procentuals.

RTR novitads 17:00

Artitgels legids il pli savens

Scrollar a sanestra Scrollar a dretga