Siglir tar il cuntegn
Inhalt

Svizra A Basilea mainan alcohol e drogas il pli savens en l'ospital

A Basilea-Citad ed en la Svizra romanda hai dà las pli bleras ospitalisaziuns staziunaras pervi d'alcohol e drogas..Quai tenor l’observatori da sanadad svizzer.

Tractament d'infusiun.
Legenda: Las pli bleras ospitalisaziuns staziunaras hai dà il 2016 en il chantun Basilea-Citad cun 17,4 sin 1000 abitants. Keystone

Quant savens vegnan persunas en Svizra tractadas a l’ospital pervi da problems cun alcohol u drogas? Cun questa dumonda è sa fatschentà l’observatori da sanadad svizzer. L’analisa dals resultats mussia ch’i dettia grondas differenzas tranter ils chantuns, scriva la «SonntagsZeitung».

Las pli bleras ospitalisaziuns staziunaras hai dà il 2016 en il chantun Basilea-Citad cun 17,4 sin 1000 abitants. Suenter Basilea-Citad vegnan bunamain tut ils chantuns da la Svizra romanda. Las pli paucas ospitalisaziuns ha gì il chantun Zug cun 4,8 sin 1000 abitants.

Motivs per las differenzas tranter ils chantuns

Sco in dals motivs tranter ils chantuns vegn numnà la differenza dal cumportament da baiver e consumar. Quai vala oravant tut per la Svizra romanda nua ch'i dat blers viticulturs. Il departament da sanadad da Basilea-Citad sa dosta cunter questa decleraziun. Tenor els gioga plitost la moda e maniera co las diagnosas en ils ospitals vegnan registradas. Per l'analisa han ils scienziads examinà l'onn 2016 passa 75’000 ospitalisaziuns che stevan en connex cun alcohol, tubac, meds da durmir, calmativs, meds cunter dolur, cannabis e cocain.

RR novitads 10:00