Siglir tar il cuntegn

Header

cuntegn

Svizra A Genevra tschertga la polizia pliras persunas suspectadas

La polizia tschertgà a Genevra pliras persunas suspectadas en connex cun las attatgas da terror. Per l'intschess da la citad da Genevra vala in stadi d'urgenza pli aut. In connex direct cun las attatgas da terror a Paris na datti betg.

A Genevra tschertga la polizia pliras persunas en connex cun in alarm da terror il mument vala per l’intschess da la citad da Genevra in augment dal stgalim d'alarm per la citad.

Sin basa d'infurmaziuns da las autoritads federalas haja la polizia augmentà lur preschientscha sco er il dumber da policists, quai ha il departament per la segirtad dal chantun Genevra declerà. In connex cun las attatgas da terror a Paris na datti tenor la polizia federala dentant betg.

Mesiras spezialas datti cunzunt datiers dals bajetgs da las Naziuns Unidas, rapporta l’agentura da novitads Reuters. Dapli indicaziuns na datti il mument betg.

Plirs portals d'internet rapportan ch'ina persunas suspectada è vegnida arrestada da la polizia.

Procura publica federala ha avert ina procedura

La procura publica federala ha conferma sin dumonda da SRF ina procedura pervi dal suspect d’in act da terror. Cunter tgi che la procedura sa drizza è il mument anc betg cler. La procura publica dal chantun Genevra ha medemamain avert ina procedura pervi dal suspect da preparaziuns ad acts da terror.

Sch’i dat in connex cun las attatgas terroristicas da Paris n’è il mument betg propi cler perquai che las indicaziuns da la polizia federala e da las autoritads genevrinas en cuntradictoricas. Sco la polizia federal ha ditg ad SRF saja la formulaziun stada «mal-formulada». Els haja infurmà las autoritads da Genevra ch’ils suspectads stettian en connex cun terrorissem, ma betg en connex cun las attatgas terroristicas da Paris.

La gasetta «Le Matin» ha publitgà fotografias dals suspectads

La gasetta da la Svizra romanda «Le Matin» ha publitgà ina fotografia che duai mussar 4 persunas suspectadas. La fotografia saja dals servetschs secrets americans CIA e lez hajan contactà las autoritads svizras, scriva la gasetta «Le Matin». Tenor inidacziuns da la gasetta saja ina da las persunas suspectadas vegnida arrestada

RR novitads 14:00/16:00/18:00

Artitgels legids il pli savens