Siglir tar il cuntegn

Header

cuntegn

A partir da l'avrigl 2022 Christian Dussey nov schef dal Servetsch d'infurmaziun

Il diplomat Christian Dussey surpiglia il post da schef dal Servetsch d'infurmaziun da Jean-Philippe Gaudin. El duai cumenzar il prim d'avrigl 2022 ses post. Enfin lura maina il vicedirectur Jürg Bühler il Servetsch d'infurmaziun strategic.

Dussey ha gia lavurà dal 1991 enfin il 1996 tar il Servetsch d'infurmaziun strategic dal Departament federal da defensiun, protecziun da la populaziun e sport (VBS), ha communtgà il Cussegl federal. Lura ha el cumenzà ina carriera sco diplomat. Suenter in stage a Prag, ha el lavurà per il Departament federal d'affars exteriurs (EDA) a Berna.

Carriera tar l'EDA

Il 1999 è Dussey daventà assistent diplomatic da Ruth Dreifuss ch'era da quai temp presidenta da la Confederaziun. Suenter in temp a Moscau ha el surpiglià il 2004 la direcziun da la secziun per segirezza internaziunala en l'EDA. Il 2010 è el daventà schef dal management da crisas dal EDA. En questa funcziun è el era stà parsura da la taskforce interdepartamentala per il pèr svizzer ch'era vegnì rapinà en il Pakistan. L'affera è ida a fin cun la fugia dal pèr.

purtret da Dussey
Legenda: Christian Dussey durant ina conferenza da pressa il 2011. Reuters

2013 è Dussey vegnì directur dal center per politica da segirezza a Genevra. Il favrer dal 2021 è el vegnì nominà sco ambassadur en l'Iran cun sedia a Teheran. Il post vala sco plazza da gronda impurtanza, perquai che la Svizra represchenta cun ses servetschs diplomatics era ils interess dals Stadis Unids.

Raschun per l'elecziun da Dussey sco schef dal servetsch d'infurmaziun sajan surtut sia experientscha da manar a moda strategica ed operativa, sco er sia savida davart l'administraziun e politica. Plinavant enconuschia el fitg bain il conturn dal servetsch d'infurmaziun naziunal ed internaziunal.

RTR novitads 15:00

Artitgels legids il pli savens