Siglir tar il cuntegn

Header

video
Survista da las novas mesiras dal Cussegl federal
Or da Telesguard dals 28.10.2020.
laschar ir
cuntegn

A partir dals 29 d'october Questas reglas valan en l'entira Svizra

Qua chattais vus la survista da las reglas che valan da nov a partir dals 29 d'october.

grafic acun si scumonds d'occurrenzas.
Legenda: RTR

Occurrenzas cun passa 50 persunas scumandadas

Quest scumond pertutga tuttas occurrenzas sportivas, culturalas ed autras occurrenzas.

Lubidas èn vinavant radunanzas communalas e radunanzas da parlaments. Er vinavant lubidas èn demonstraziuns ed acziuns da rimnar suttascripziuns per referendums ed iniziativas.

Maximal 10 persunas tar occurrenzas privatas

Perquai che las bleras infecziuns capitan en il rom privat, vegn il dumber per occurrenzas privatas limità sin 10 persunas.

Maximal 15 persunas tar activitads da temp liber

Activitads da temp liber sportivas e culturalas èn lubidas cun maximal 15 persunas, sche la distanza po vegnir resguardada. Da la mascra pon ins desister sche la stanza è gronda avunda, per exempel en hallas da tennis u en salas grondas. En il liber sto be la distanza vegnir resguardada.

grafica cun reglas per sport, cultura e scolas.
Legenda: RTR

Sport da contact è scumandà. En il rom professiunal da sport e cultura èn trenaments e campiunadis sco er exercizis e preschentaziuns lubidas.

Tar il chantar vegnan spezialmain blers guts dads liber. Perquai na pon chors laics betg exercitar. Chors professiunals dentant schon. Ma er quels na pon betg concertar.

Scolas autas ston far instrucziun a distanza

A partir da glindesdi, ils 2 da november ston las scolas autas midar sin instrucziun a distanza. Instrucziun da preschientscha resta dentant lubida en scolas obligatoricas ed en gimnasis e scolas professiunalas.

grafica cun si scumond da discos e locals da saut e restaurants e bars.
Legenda: RTR

Discos e locals da sautar ston serrar

En quests locals datti in privel considerabel da s'infectar, perquai ston discos e locals da sautar serrar.

Ustarias e bars pon avair maximal 4 persunas vid ina maisa, cun excepziun da famiglias cun uffants. Plinavant ston quels serrar tranter las 23:00 la saira e las 06:00 la bun'ura.

grafica che mussa l'obligatori da mascras schlargià.
Legenda: RTR

Obligatori da mascra vegn schlargià

Da nov èsi da purtar mascras er ordaviert en zonas da peduns, davant butias, ustarias e sin fieras, er sin per exempel terrassas da restaurants e bars.

Er scolas dal stgalim secundar II ston introducir l'obligatori da mascras. Quai munta pia tut ils stgalims suenter ils nov onns obligatoris da scola, per exempel scolas professiunalas.

vinavant vala, da lavurar sche pussaivel da chasa, lavar savens ils mauns, reducir ils contacts e tegnair distanza.
Legenda: RTR

RTR actualitad 17:00

Artitgels legids il pli savens

Scrollar a sanestra Scrollar a dretga