Il santeri «Rosengarten» è mutà ils ultims onns ad ina insla ecologia e biodiversa. «Las famiglias dals defuncts e da las defunctas stiman il reservat natiral», di il manader dal santeri Hannes Schneider cuntent envers SRF.
Tgi che visita ina fossa sin il santeri «Rosengarten» ad Aarau u tschertga in pau ruaus, chatta entamez la citad in lieu ecologic generus, concepì a moda natirala. «Grazia a bleras plantas indigenas avain nus blers insects che attiran da lur vart puspè numerus utschels rars», declera l'ortulan da santeri Peter Schär ad SRF.
In santeri che viva
Perfin mamifers sco la vulp ed il tais, ma er la fiergna, l'erizun e perfin in chavriel fan diever dal lieu quiet e nunilluminà da notg. «Er pradas in pau selvadias, inslas da lain vegl e surfatschas betg-segadas fan or dal santeri in refugi da spezia speziala», declera il manader da santeri Hannes Schneider. Adina pli savens survegnan els cumpliments per questa moda da santeri – era sch'i na vesa betg adina ora bel: «I n'è oramai betg adina primavaira.»
Nov reglament porta er restricziuns
Main natiral vesi per part or sin las fossas. «Betg darar vegnan fossas decoradas cun plantas che dovran fitg bler'aua ed èn perquai difficilas da tgirar», di Peter Schär. El cusseglia a persunas interessadas da dumandar ils ortulans e las ortulanas per tips e trics, avant che plantar insatge sin la fossa.
Bainbaud duess in nov reglament da santeri procurar ad Aarau per decoraziuns da fossas pli ecologicas. «Sin chandailas solaras, glischs cun battarias u ornaments da plastic vulessan nus renunziar en futur ed uschia deliberar la natira sin il santeri da questa polluziun nun-necessaria.», di il manader dal santeri Hannes Schneider, ch'è conscient ch'ina tala midada basegna ina buna communicaziun: «Forsa daventa quai er in pau difficil, perquai ch'i pertutga l'individualitad sin la fossa – e quella è atgnamain chaussa da las persunas che tgiran las fossas.» Tuttina veglian ins almain dar impuls en quella direcziun.