Siglir tar il cuntegn

Header

audio
Mezdi: Sessiun Berna – PPS vul stritgar biro d'egualitad
Or da Actualitad dals 28.11.2018.
laschar ir. Durada: 3 minutas 24 Secundas.
cuntegn

Svizra Abolir biro d'egualitad? – Na

Stritgar il biro d’egualitad dad umens e dunnas, quai vul ina gronda part da la Partida populara svizra. A chaschun da la debatta dal preventiv per proxim onn è vegnì debattà davart la proposta da stritgar ils meds finanzials per il biro. Però il Cussegl naziunal ha refusà quella proposta.

L'egualitad tranter dunnas ed umens saja per ina gronda part cuntanschida – anzi – la tendenza saja quella, ch'ils umens vegnian discriminads en divers secturs, uschia Sebastian Frehner il cusseglier naziunal da la PPS da Basilea citad. Perquai vul el abolir il biro d'egualitad. Tenor Frehner saja numnadamain il biro d'egualitad in'organisaziun dal stadi da lobbying per las dunnas.

Sche dunnas fissan ina rassa, fiss quai ch'il biro d’egualitad fa, politica d’apartheid!
Autur: Sebastian Frehner Cusseglier naziunal PPS/BS

E Sebastian Frehner fa in satgin exempels: Il biro d’egualitad n'haja anc mai pretais che dunnas stoppian era far servetsch da militar. Ed era tge che pertutga ils custs da sanadad sajan ils umens discriminads pretenda Frehner. Las dunnas vegnan en speranza e vivan pli ditg, han dentant betg da pajar pli autas premias da las cassas da malsauns, di el.

Nagina chapientscha per intent

L'intent da Frehner e da la PPS n'ha insumma betg chattà sustegn tar las autras partidas. Quellas han argumentà per exempel cun la differenza da pajas ch'è anc adina marcanta, era sche l’egualitad fiss numnadamain scritta en la Constituziun federala.

Sche Frehner chatta ch'el saja sco um discriminà stuess el en sasez pretender dapli daners per il biro d’egualitad contra il burgais democrat da Berna Heinz Siegenthaler.

Ed era tar il minister da finanzas e cusseglier federal Ueli Maurer n'ha l'intent d'abolir il biro d’egualitad betg chattà encletga. La situaziun saja sa meglierada, dentant la finamira n'è anc betg cuntanschida.

En divers secturs èn las dunnas discriminadas, quai ves jau era sco bab e tat. Nus duvrain enavant il biro d'egualitad.
Autur: Ueli Maurer Cusseglier federal

Cun 125 cunter 55 vuschs e 4 abstenziuns ha sulettamain ina maioritad da la Partida populara svizra sustegnì l'intent da Sebastian Frehner. Ed uschia ha il cussegl naziunal decis da garantir era en avegnir il biro d’egualitad – tant per dunnas sco era per umens.

RR actualitad 12:00

Artitgels legids il pli savens