Siglir tar il cuntegn

Header

cuntegn

Absolvents d'auters stadis Tgi che ha studegià en Svizra duai er pudair lavurar qua

Absolvents d’ina scola auta che na derivan betg da l’Uniun europeica, duain dastgar star en Svizra suenter ch’els han fatg lur diplom. Quai propona il Cussegl federal per uschia far frunt a la mancanza da persunal qualifitgà. Ils chantuns e las bleras partidas beneventan quests plans.

La Svizra haja investì en questas persunas. Perquai saja bun sche la Svizra possia silsuenter era profitar dad ellas, han ditg ils directurs chantunals da l’economia publica. Sulettamain la PPS refusa questa proposta. Decider sto il parlament.

Manco da persunal qualifitgà

Sch'ina absolventa da l'ETH che deriva da l'India vul restar en Svizra, dovra ella in permiss da lavurar. In tal permiss survegnan dentant be in dumber limità da persunas che n'èn betg da stadis da l'Uniun europeica. Er persunas che han serrà giu ina scolaziun ad ina Scol'auta crodan en questa categoria.

Il parlament ha perquai dumandà il Cussegl federal da far ina midada per simplifitgar a talas persunas l'access al martgà da lavur en Svizra. Sur tut cura che questas persunas pon vegnir duvradas en ina branscha nua ch'il persunal qualifitgà manca. Ils chantuns ch'èn responsabels per reparter ils permiss,beneventan questa proposta per la pli gronda part.

Chantuns vulan che persunal qualifitgà restia

Urban Camenzind, Cusseglier guvernativ e president dals directurs chantunals da l'economia publica, argumentescha, ch'i saja in avantatg da laschar lavurar persunas en las qualas la Svizra ha er investì, en l'economia svizra, gist en las branschas nua ch'il persunal manchia.

purtret da Camenzind.
Legenda: Tenor Urban Camenzind duain ils students e las studentas en ils quals la Svizra ha investì er restar en Svizra. Keystone

PPS vul che students esters pajan sez ils custs per studi

Las partidas politicas beneventan per la pli gronda part questa proposta. Sulet la PPS è cunter quella. Er sch'i va be per radund 200 fin 300 persunas ad onn: Per la PPS cuntrafetschia questa idea a la voluntad ch'il pievel ha decidì cun il Gea a l'iniziativa cunter l'immigraziun da massa il 2014.

purtret dad Aeschi en il parlament.
Legenda: Thomas Aeschi vul far pajar studentas e students da l'ester in pretsch che cuvra ils custs per lur stdi. Keystone

Empè da pajar a studentas e students esters cun daners da taglia ina scolaziun, fa il president da la fracziun da la PPS, Thomas Aeschi, in'autra proposta: «La PPS pretenda che studentas e students esters duain pajar en avegnir in pretsch che cuvra ils custs per in studi en Svizra.»

Economia sustegna proposta

Dasper ils chantuns e las bleras partidas, è er l'economia persuenter che forzas da lavur scoladas en Svizra pon er restar qua – tranter auter er l'uniun tetgala Economiesuisse, la federaziun da la branscha da chemia e farma sco er l'uniun da medis e medias FMH.

La FMH scriva, che gist la pandemia haja mussà tge rolla centrala ch'il provediment en la branscha da sanadad haja. Perquai saja impurtant che medias e medis possian restar en Svizra suenter ch'els hajan fatg la scolaziun ad in'universitad svizra.

RTR novitads 11:00

Artitgels legids il pli savens