Siglir tar il cuntegn

Svizra Abunament general da la saira per 1'000 francs

Il survegliader dals pretschs Stefan Meierhans s’engascha per in abunament general da la saira. Per 1’000 francs duain clients pudair nizzegiar il traffic public a partir da las 19:00 la saira. El saja segir che quest’offerta avess success, ha ditg Meierhans en in’intervista cun gasettas romandas.

Il survegliader dals pertschs Stefan Meierhans.
Legenda: Malgrà che l'emprova dal 2015 è stada modesta: Meierhans pretenda ina soluziun pli favuraivla per il traffic public. Keystone (Archiv)

Enstagl da cuntinuar ad augmentar l'offerta haja quai num da meglierar il grad d'utilisaziun. En media saja quel tar il traffic public en Svizra mo tar 20% - quai malgrà ch’ils trens èn pli che plains durant temps da fulla: «La realitad è che quatter da tschintg sezs restan savens vids», uschia Meierhans.

Project da pilot cun pitschen success

Sche quai saja la finamira da far pli attractiv il traffic public en Svizra, lura stoppian ils pretschs vegnir reducids drasticamain. «I na fiss betg l’emprima giada», di Meierhans e regorda al pretsch d’introducziun da l’abunament da mesa taxa da 100 francs.

In'emprova cun in abunament general da la saira hai dà la primavaira 2015, il success era dentant stà fitg modest.

Dapli concurrenza tar bus a lunga distanza

En l’intervista ha il survegliaders dals pretschs plinavant fatg attent a las grondas lingias da bus a lunga distanza: «Per regla èsi bun d’avair concurrenza». Uschia ha el renvià al traffic aviatic, nua ch’i dettia adina dapli offertas per pretschs adina pli pitschens. «Pertge na duai quai che funcziuna en l’aria betg er esser pussaivel sin plaun?», ha ditg Meierhans.

RR novitads 07:30