Suenter mesanotg è la polizia vegnida alarmada pervi dal schabetg sin l'areal da la firma, ha communitgà la procura publica. Cura che las forzas da salvament sajan arrivadas al lieu hajan radund 25 collavuraturs gia gì bandunà il bajetg.
Sco emprim avevan ils collavuraturs da Bell temì ch'i saja sortì il gas tissientà amoniac. Spezialists han dentant constatà ch'il med per dischinfectar saja vegnì liber en la stanza da producziun ed ha chaschunà ils problems cun las vias respiratoricas. Questa substanza savuria sumegliant sco amoniac. Per l'ambient na dettia nagin privel. La raschun per quest accident vegn anc examinada da la procura publica.
Amoniac sortì avant in'emna
Gia l'emna passada avevi dà in accident da chemia tar Bell. Suenter lez accident avevan 12 persunas stuì ir en l'ospital, quai perquai che amoniac era sortì en in dals edifizis da producziun.
Accident l'avrigl
L'avrigl avevi dà in sumegliant cas. En in edifizi da producziun era er sortì amoniac. 13 collavuraturs avevan stuì ir en l'ospital per controlla, han dentant pudì bandunar quel suenter curt temp. L'avrigl era l'accident capità durant lavurs da revisiun vid in indriz per sfradentar. Lavurers eran vid remplazzar ventils.
RR novitads 08:00