Siglir tar il cuntegn

Header

Navigaziun

Autos da polizia e policists al lieu da l'accident.
Legenda: Tar in accident durant lavurs vi d'ina pendiculara èn vegnidas blessadas pliras persunas. Keystone
cuntegn

Accident da lavur In mort e 6 blessads tar accident cun pendiculara al Titlis

Tar ina telecabina da las pendicularas dal Titlis hai dà la mesemna avant mezdi in accident. In lavurer è mort e sis ulteriurs lavurers èn blessads. La Polizia chantunala da Sursilvania ha confermà quai.

L’accident è capità durant las lavurs da revisiun regularas ch'han cumenzà il glindesdi. Plirs lavurants sajan stads involvids en lavurs vi da la suga da la pendiculara, cura che la francada temporara saja sa sligiada. Ils lavurants èn lura vegnids tutgads da la suga e dal stabiliment auxiliar.

In collavuratur da las pendicularas dal Titlis è vegnì blessà uschè ferm, ch'el è mort anc al lieu da l'accident. Duas ulteriuras persunas involvidas en las lavurs èn vegnidas blessadas considerablamain ed ina mez-grev. Quellas trais persunas èn vegnidas transportadas cun il helicopter en l'ospital. Dapli indicaziuns tar il stadi da sanadad da quellas persunas na datti il mument betg.

Trais ulteriuras persunas èn vegnidas blessadas levamain. Ellas han pudì vegnir tractadas al lieu. Occupads cun las lavurs da revisiun eran impiegads dals produciders da la pendiculara e da la suga sco er impiegads da las pendicularas dal Titlis.

Capità è l'accident sin la Gerschnialp radund 35 km en il sid da Lucerna al Lai dals Quatter Chantuns. La Gerschnialp è sin 1300 meters sur mar sur la val dad Engelberg. La pendiculara pertutgada – l'uschenumnà Titlis-Express – è dapi il 2015 en funcziun. Sin ina lunghezza da 2,7 km superescha ella ina differenza d'autezza dad 800 meters e po transportar 2'400 persunas per ura.

RR novitads 11:00