Siglir tar il cuntegn

Header

Navigaziun

cuntegn

Accident sin il Rain Nav da vitgira ha sdrimà duas punts

A Basilea ha ina nav da vitgira che n'era betg pli abla da manevrar sdrimà pilasters da duas punts. L'accident saja capità d'in temp che bleras persunas sajan sa nudadas en il Rain. Blessads n'hai tenor la polizia batg nagins.

La nav «Camaro VI» è vegnida annunziada enturn las 18:30 la gievgia saira a la polizia, ha declerà in pledader a l'Agentura da novitads Keystone SDA. Il motor principal dal bastiment saja stà ord funcziun. La raschun per quest defect n'è anc betg sclerida. Be il motor davant tar la nav funcziunava anc.

Ils pumpiers han lura accumpagnà la nav, tar ina punt amez dal Rain ha ella dentant tuttina sdrimà in dals pilasters. Suenter è ella ida enavant ed ha er sdrimà in pilaster da la Johanniterbrücke. Sut la Dreirosenbrücke han l'equipa lura pudì manar la nav a l'ur dal flum ed han pudì fermar la nav. La polizia examinescha il cas.

Purtret da la nav.
Legenda: Camaro VI, la nav ha sdrimà dus pilasters da duas punts sin il Rain perquai ch'il motor principal è crudà or. Keystone

Nagins blessads

Suenter l'alarm ha la polizia serrà il rain per bastiments. Er las persunas che sa nudavan en il flum ha la polizia supplitgà da vegnir or da l'aua. Davart nudaders blessads n'hai dà naginas indicaziuns. Ils trais commembers da l'equipa da la nav neerlandaisa n'èn betg vegnids blessads.

RR novitads 06:00