Legenda:
Viandar, ir cun velo e mountainbike vegn adina pli popular en Svizra – ed adina pli relevant per l'economia turistica.
Keystone
cuntegn
Activitads temp liber - Viandar, ir cun velo e mountainbike è pli popular che mai
La popularitad da viandar, ir cun il velo e cun il mountainbike è s'augmentada ils davos onns ed era la muntada economica è gronda. Quai mussan trais studis da L'Uniun svizra per sendas da viandar, SvizraMobil e l'Uffizi federal da vias Astra.
57% da la populaziun svizra sur 15 onns van a viandar per far sport e sa mover. En media fa mintgina e mintgin 15 turas ad onn che cuzzan en media trais uras, communitgescha l'Astra. Uschia vegn viandà en Svizra mintg'onn durant radund 200 milliuns uras.
Per 42% da la populaziun svizra sur 15 onns fa ir cun velo part da lur activitads da sport e moviment. Ina cifra ch'è creschida fitg ils ultims onns. En media van Svizras e Svizzers mintg'onn sin 15 turas cun il velo. Da quests èn radund 10% tscha e là sin in e-bike.
Mountainbike sco factur economic
Mountainbikeras e mountainbikers genereschan en Svizra radund 400'000 pernottaziuns pajadas. Cunquai che las expensas en media muntan a 41 francs, munta quai ina svieuta da passa 300 milliuns francs. Da quai profiteschan surtut hotels, campadis e persunas cun abitaziuns da vacanzas.
Ils 3 studis
Avrir la boxSerrar la box
La basa dals 3 studis èn la retschertga represchentativa «Sport Svizra 2020», la retschertga tar viandantas e viandats sin sendas e velocipedistas e velocipedists sin las rutas da velo, ed ina retschertga tar mountainbikers e mountainbikeras. Tut las intervistas dateschan dal 2019 – pia anc avant la pandemia da corona.
