La Procura publica federala ha denunzià l'um ch'è vegnì franà mardi davant la Chasa federala a Berna pervi d'in delict pussaivel cun material explosiv. L'um è actualmain en arrest e vegn interrogà dals investigaders da la Confederaziun.
Al domicil dal suspectà, en il Vallais han ins fatg ina perquisiziun da la chasa, sco la procura publica ha communitgà. Tar las inquisiziuns collavura l procura publica cun l'Uffizi federal da polizia (fedpol) sco er la Polizia chantunala dal Vallais e da Berna.
Polizia e procura publica han retschertgà en il conturn dal suspectà. Sco la procura publica declera sajan ins vi da sclerir vinavant en tge stadi corporal e mental che l'arrestà saja stà. Suenter ch'ins haja fatg mardi in test svelt per material explosiv vi da l'um e quel saja stà positiv, ha la Procura publica federala surpiglià il cas. Delicts cun material explosiv èn tenor lescha da tractar cun la cumpetenza da la Confederaziun. La Procura publica federala ha accentuà ch'i valia sco adina la presumziun d'innocenza.
Gronda acziun da polizia
L'um suspectà haja occupà uras ditg, fermamain la polizia davant la Chasa federala. Sco perditgas han declerà haja l'um purtà ina giacca da protecziun cun satg per fermar in'arma. Quai haja fatg attent il servetsch da segirezza da la Chasa federala a l'entrada dal sid dal bajetg. Plinavant saja sa mussà che l'auto parcà sin la Plazza federala saja stà dal suspectà. La Polizia chantunala ha lura prendì mesiras severas ed ha serrà giu las vias enturn la Chasa federala.
Acziun da polizia sin la Plazza federala
La polizia ha franà in um tar la Chasa federala. El saja dà en egl pervi da ses cumportament suspectus. La Chasa federala sco er ulteriurs bajetgs en il conturn èn vegnids evacuads il suentermezdi. Entant ha la polizia puspè dà liber la plazza.
Tar ils bajetgs evacuads tutga l'edifizi dal parlament sco er las alas ost e vest da la Chasa federala, sco Jolanda Egger da la Polizia chantunala bernaisa ha declerà. Er evacuà hajan ins la part davant da l'edifizi da la Banca naziunala svizra, sco er la Banca Valiant e la Banca Chantunala Bernaisa.
Um en mandura da cumbat
Indicaziuns pli detagliadas davart l'um franà e ses cumportament n'ha la polizia betg dà. Il «Blick» ha rapportà che la polizia haja arrestà in um en ina mandura da cumbat.
Il schef da la tecnica dal Blick, Beat von Tobel ha declerà en in video ch'el saja gist stà da viadi direcziun la via da la Chasa federala, cura ch'in um en ina mandura da cumbat haja surpassà el. Sco emprim haja el pensà ch'i saja ina persuna dal team da segirezza.
L'um haja vulì survegnir access a la Chasa federala, nua ch'el saja dentant vegnì franà da la polizia. L'um haja parì fitg calm, rapporta Tobel. El haja cumenzà a discutar cun la polizia.
Auto suspectus sin Plazza federala
Er in vehichel suspectus saja stà sin la plazza davant la Chasa federala. In roboter da bumbas da la polizia ha examinà il vehichel. Numerusas forzas da segirezza ed autos da polizia sajan stads al lieu.