Atgnas retschertgas hajan mussà che bun la mesadad dals giasts prendian l'auto privat per cuntanscher la destinaziun da vacanzas. Per tals saja memia stentus e cumplitgà da transportar skis ed auter equipament da sport d'enviern cun ils meds publics. Inspirà da quai vul Svizra Turissem meglierar ed augmentar il confort per ils giasts ed ha perquai lantschà in'acziun speziala, «Bagage special», hai num en la communicaziun.
Sch'ins viagia cun il traffic public pon ins cudeschar il transport da la bagascha tar la Viafier federala. Lezza vegn per las cofras ed ils skis da l'agen domicil enfin en l'hotel. Durant l'acziun è questa purschida gratuita. A l'acziun che cuzza enfin ils 30 d'avrigl sa participeschan 48 destinaziuns da vacanzas, la gronda part en il Grischun. Tut en tut sa participeschan er 240 hotels che garanteschan il transport da la bagascha da la staziun enfin tar l'hotel.
RR novitads 12:00