Ils acziunaris da la banca gronda UBS han refusà da distgargiar il cussegl d'administraziun e la direcziun per l'onn da gestiun 2018. Be 42% dals acziunaris han vuschà persuenter. L'onn avant eran quai anc prest 90%.
Trumpà che la distgargia è refusada
Il president dal cussegl d'administraziun da l'UBS Axel Weber è stà trumpà che la distgargia è vegnida refusada: «Nus prendain per enconuschientscha che Vus n'avais betg acceptà tut nossas dumondas. Nus prendain serius quai e vegnin a tematisar quai en il cussegl d'administraziun.»
La fin da favrer aveva ina dretgira a Paris sentenzià l'UBS pervi da omissiun fiscala e lavada da daners. Sco chasti ha l'UBS da pajar 4,5 milliardas euros.
Ulteriur tema – bunificaziuns
Er las bunificaziuns per il management èn stadas tema durant la radunanza generala da la pli gronda banca svizra. Las bunificaziuns na stettian en nagina relaziun cun la performance dal curs da las aczias. Il rapport da bunificaziuns è vegnì approbà cun 79,4% da las vuschs en favur dal cussegl d'administraziun. Il president dal cussegl d'administraziun Axel Weber n'era dentant tuttina betg cuntent. Avant in onn è vegnì ditg Gea anc cun 81%.
RR novitads 15:00