Siglir tar il cuntegn

Header

video
Salsiz, chaschiel ni miel - ils hits en il chanaster
Or da RTR dals 28.09.2016.
laschar ir. Durada: 47 Secundas.
cuntegn

Svizra Ad Alpinavera n’è il salsiz betg liongia

Salsiz ed andutgels èn il hit da vendita dad Alpinavera. Quai è dentant mo ina pitschna part dad Alpinavera. L’organisaziun è vegnida fundada avant 10 onns per promover la vendita da products alpins e regiunals.

Dals furners e conditers enfin al Parc Ela e Grischun Vacanzas: Els tuts èn commembers da l’uniun Alpinavera. Uschia pon els vender lur products cun il label da l’uniun. Per pudair survegnir quel han furneras, mazlers u signunas da producir a maun e cun ingredienzas che derivan per 80% da la regiun, scriva l’organisaziun sin sia pagina en la rait.

Alpinavera

Avrir la box Serrar la box
  • è in’uniun interchantunala en GR, UR, GL e TI
  • promova products alpins, regiunals e da muntogna
  • ha certifitgà enfin uss 1’000 products
  • fa quai dapi 10 onns
  • vegn finanziada da commembers, Confederaziun e chantuns

Commembers da 4 chantuns svizzers

Actualmain èn la pli part dals commembers dal Grischun, numnadamain 11. Medemamain da la partida èn trais dal chantun Uri, l’uniun da purs dal chantun Glaruna e dal Tessin il chantun Tessin sco tal. La situaziun en il Tessin vegn a sa midar proximamain, di la manadra da gestiun dad Alpinavera, Jasmine Said Bucher. Er là haja tgi che fa products alpins badà tge ch’ina promoziun communabla da products possia effectuar.

La vitrina virtuala – il shop dad online

Cun quai che betg tut ils amaturs da products alpins rivan a Cuira tar il biro e magazin dad Alpinavera porscha l’organisaziun dapi 5 onns la pussibilità da cumprar products en la rait. Quai, uschia Jasmine Said Bucher, saja lur vitrina da products.

Tge che la clientella spetga da products regiunals ed alpins mussa la glista da hits da products vendids. La pli gronda svieuta fa Alpinavera cun products da charn elavurada. Auters hits èn chaschiel e miel d’avieuls. En prima lingia èn quai products che san vegnir empustads e mangiads senza far grondas lavurs en cuschina, numnadamain products cunvegnents.

In autra vitrina – ils martgàs sin ils pass

La gronda part da la lavur na cumpara dentant betg in vitrina: Las collavuraturas dad Alpinavera cusseglian, organiseschan, scoleschan e sustegnan differentas activitads per e cun lur commembers. Quai èn per exempel ils martgads sin ils pass o era eveniments singuls sco l’Agrischa e proximamain il Prättigauer Alpspektakel (06-10 enfin 09-10-2016 a Küblis e Seewis).

Artitgels legids il pli savens