Sco il Departament da defensiun ha communitgà èn tranter ils recruts 65 recrutas. L’armada duvrass radund 20’000 recruts per onn. Ensemen cun la recruta da stad èn quest onn 21’800 persunas entradas en servetsch d’armada. Per regla bandunan dentant 20% dad els la scola da recrut quai ord da motivs medicinals ni ord auters motivs, ha conferma il pledader da l’armada Daniel Reist. Uschia pudessan radund 18’000 schuldads vegnir repartids sin ils corps militars, uschia vegnia quai probabel strusch a tanscher, ha ditg Reist.
Cun far la mesadad na tanscha quai anc adina betg
Cun la refurma da l’armada planisada vegn la cumpart da schuldads reducida per la mesadad, ma l’effectiv da schuldada na mida betg uschè fitg. Uschia dettia quai era suenter la refurma in problem da recrutar avunda schuldada per l’armada, ha ditg il pledader dal Departament da defensiun.
32 persunas eran in privel e ston star a chasa
En tut ha il Departament da defensiun franà la recrutaziun tar 32 persunas perquai ch'ellas pudessan esser ina ristga per sa sezzas u per auters. Sur dals motivs concrets n’ha il Departament betg fatg indicaziuns. Per regla èn quai persunas ch’èn vegnidas suenter la recrutaziun en conflict cun la lescha ni che han fatg smanatschas correspundentas, ha ditg Reist.
RR novitads 12:00