Siglir tar il cuntegn

Header

cuntegn

Svizra Adatg: fin 38 grads

MeteoSvizra avertescha da la chalira en la gronda part dal pajais. Sulet en las Alps ed il Giura na vegnia betg uschè chaud. En las bleras parts quinta l'uffizi federal per la fin d'emna cun temperaturas tranter 34 fin 38 grads. En il Grischun èn pertutgadas las regiuns Schiers, Landquart e Cuira.

L'avertiment da chalira da MeteoSvizra vala fin ils 7-7-2015 la saira las 20:00. Cun la gronda chalur crescha era il privel d'incendis da guaud. En il chantun Grischun vala in privel considerabel en bunamain l'entira Engiadina e la Val Müstair, en il Grischun central, Valragn, Plaun la regiun da Cuira, Tschintg Vitgs, Signuradi ed il Partenz. (guarda link).

Incendi a Martina

Il venderdi suentermezdi hai dà in incendi da cultira a Martina. Suenter ferms urizis cun chametgs en la regiun da Cuntscheras ha piglià fieu la cultira sin ina surfatscha da 20 sin 30 meters. Sco quai che la polizia chantunala scriva sajan ils pumpiers Muttler Valsot stads en acziun cun 30 umens. Era in helicopter è stà en acziun. Pervi da las lavurs da stizzar è la via principala stada serrada per radund 3 uras. Il traffic è vegnì svià sur Nauders.

Ulteriura notg tropica

En Svizra ha la zona da pressiun auta «Annelie» procurà per in'ulteriura notg tropica. En bleras regiuns n'èn las temperaturas betg sa sbassadas sut 20 grads la sonda endamaun. En tscherts lieus en il chantun Basilea-Citad ed il Vallais mussava il termometer anc la sonda marvegl passa 25 grads.

RR novitads 10:00

Artitgels legids il pli savens