Suenter il funeral ad Ecône han las cartentas ed ils cartents gì ina segunda pussaivladad per prender cumià da l’anteriur uvestg Vitus Huonder. Il venderdi ha gì lieu en la catedrala a Cuira in requiem, al qual dasper represchentants da l’uvestgieu era ils uvestgs da las autras diocesas svizras èn sa participads. Sper persunas or da la baselgia sco per exempel divers spirituals da diversas vischnancas, han er persunas or da la politica fatg part, uschia per exempel ils cussegliers guvernativs Martin Bühler e Marcus Caduff e cusseglier dals chantuns Stefan Engler.
-
Bild 1 von 5. Sin viadi en la catedrala: il diacon Agil Raju, l'uvestg Joseph Bonnemain, il nuntius apostolic Martin Krebs e l'uvest da Son Gagl Markus Büchel. Bildquelle: Keystone.
-
Bild 2 von 5. L'uvestg Joseph Bonnemain durant il requiem per Vitus Huonder, ils 19 d'avrigl 2024 en la catedrala a Cuira. Bildquelle: Keystone.
-
Bild 3 von 5. Joseph Bonnemain sa drizza a las persunas en la catedrala, durant la ceremonia da memoria per Vitus Huonder. Bildquelle: Keystone.
-
Bild 4 von 5. Er ils cussegliers guvernativs Marcus Caduff e Martin Bühler èn stads preschent. Bildquelle: Keystone.
-
Bild 5 von 5. Cun in grond purtret è l'uvestg defunct Vitus Huonder stà preschent en la catedrala. Bildquelle: Keystone.
Funeral ad Ecône
Mesemna avantmezdi han cartentas e cartents prendì cumià ad Ecône en il Vallais Sut da l’anteriur uvestg da Cuira Vitus Huonder. Tranter ils cartents è era Joseph Maria Bonnemain, il successur da Vitus Huonder a la curt da l’uvestgieu da Cuira.
El è dentant il sulet uvestg preschent en la baselgia dal seminari da la confraternitad da son Pius X. Sco quai che la Conferenza episcopala ha annunzià, sajan tut ils uvestgs danor l’uvestg Bonnemain e l’uvestg Felix Gmür da Basilea ad ina retratga spirituala. L’uvestg Gmür è il mument a Lourdes nua ch’el maina in pelegrinadi interdiocesan.
-
Bild 1 von 2. Bildquelle: RTR.
-
Bild 2 von 2. La baselgia da la confraternitad da son Pius ad Ecône è bain emplenida. Bildquelle: RTR.
Sco quai che l’uvestg Bonnemain ha annunzià na prenda el però betg part activamain a la celebraziun liturgica. El haja deplorà davent da l’entschatta che Huonder saja stà ses ultims onns datiers da la confraternitad da Pius ed haja passentà ses ultims onns a Wangs en l’Institut Sancta Maria, la scola per mats privata da la confraternitad. Lezza haja in status irregular en la Baselgia catolica. Per quest motiv na vegnia el betg a concelebrar la liturgia.
Paucas uras suenter la mort da Vitus Huonder ils 3 d'avrigl èsi vegnì enconuschent che l'anteriur uvestg da Cuira na vegn betg sepulì davant la catedrala a Cuira – nua che gia ses antecessurs ruaussan. Huonder vegn sepulì sin agen giavisch ad Ecône. Là è dapi il 1970 l'emprim seminari sacerdotal da la confraternitad tradiziunala da Pius X. Là è era l'ultim ruaus da l'archuvestg Marcel Lefebvre, il fundatur da la confraternitad sacerdotala. Vitus Huonder vegn sepulì sper Lefebvre en la cripta dal seminari.
Vitus Huonder aveva giavischà da betg vegnir sepulì a Cuira, mabain ad Ecône en il Vallais sin il santeri da la confraternitad tradiziunala da Pius. Cun questa decisiun ha Huonder rut cun la tradiziun da vegnir sepulì a Cuira.