Entant han er ils chantuns Vad, Genevra e Vallais implementà restricziuns pli severas. Sco il chantun ha communitgà, ston tut ils restaurants e fatschentas serrar a partir da las 18:00. Uschia han implementà mesiras severas ils chantuns Tessin, Grischun, Vallais, Genevra, Neuschatel, Basilea-Champagna ed il Giura.
Dumandà sustegn da l'armada
En connex cun il coronavirus han 5 chantuns dumandà l’armada svizra per sustegn enfin ussa. Sper il Tessin, ils dus chantuns Basilea e Turgovia era il Grischun.
Bun 300 schuldads dal battagliun da spital 5 da l'armada èn entrads en servetsch en la Svizra centrala. Els sepreparan sustegnair las autoritads civilas en il cumbat cunter la derasaziun dal coronavirus. Tenor il pledader da l'armada lavuran bun 10% dad els en il sectur da sanadad.
Il commando da l'armada haja perquai decidì ch'els stoppian en emprima lingia gidar tar la scolaziun da tschels schuldads. Per ch'i na dettia naginas stretgas da persunal, possian els silsuenter sin dumonda puspè turnar a lur lieu da lavur.
L'armada svizra dumbra 4 battagliuns dad ospital. Sch'era aunc ulteriurs schuldads vegnian mobilisads, na saja il mument betg anc decidì, hai gì num da l'armada. Gia en acziun pervia dal coronavirus è l'armada cun 2 ambulanzas en il Tessin.