Siglir tar il cuntegn
Inhalt

Svizra Adina dapli fugitivs en chantun Son Gagl

L’emna passada han 526 fugitivs passà ils cunfins dal il chantun Son Gagl. Quai è bun il dubel en cumparegliaziun cun l’emna avant. La situaziun èn Svizra è però calma envers ils pajais cunfinants.

Fugitivs arrivan a Buchs SG.
Legenda: Il Secretariat statal per migraziun aveva supplitgà ils chantuns da sa preparar sin dapli fugitivs. Keystone

Tenor la polizia chantunala dal Son Gagl èn 191 persunas vegnidas ord la Siria e 165 persunas ord l’Afghanistan. Ils ulteriurs fugitivs arrivan ord l'Iran, l'Irac, il Pakistan e l'Eritrea. Cunquai ch’il center federal da retschaviment ad Altstätten è plains, vegnan ils fugitivs alloschads en in vegl bajetg da la posta a Buchs.

Betg tuts vulan restar

Radund 50 fugitivs na vulevan betg restar en Svizra. Els en dentant era vegnids registrads en ils centers da retschaviment, inditgescha la polizia.

Traplà in cuntrabandist sirian

Il venderdi ha la polizia plinavant tschiffà in um sirian che vegn suspectà d'esser in cuntrabandist d'umans e surdà el a la procura publica. L’um è entant puspè vegnì relaschà.

Naginas controllas sistematicas als cunfins svizzers

Il Cussegl federal na vesa nagin basegn d'introducir controllas sistematicas al cunfin svizzer. La pretensiun era vegnida da la fracziun da la PPS suenter che la Germania, l'Austria e la Slovenia avevan puspè cumenzà a controllar ils cunfins.

Tenor la Cussegliera federala Simonetta Sommaruga sajan ni l'urden public ni la segirtad interna da la Svizra periclitads pervi dals fugitivs.

RR novitads 17:00 / 18:00