Malgrà che las ediziuns da las gasettas svizras sa reduceschan, restan ils lecturs fidaivels. Dapli che mintga terz consument da medias nizzegia l'offerta digitala da las chasas edituras. Da quests legia mintga tschintgavel omadus, ils artitgels sin palpiri sco er online. Quai annunzia la WEMF SA per la perscrutaziun da reclama.
A numerusas gasettas sin palpiri gartegia bain da francar en il martgà lur offerta digitala. Tar «20 minutas» nizzegia radund la mesadad dals lecturs la purschida en la rait. Il «Blick» ha dapli lecturs en la rait che sin palpiri, quai sco sulet titel da medias svizzer.
Gasettas perdan vinavant lecturs
Aifer in onn han las gasettas svizras danovamain pers levamain lecturs. Quai mussan las novas cifras da la WEMF SA per la perscrutaziun da reclama. Tenor l'analisa han las gasettas grondas pers ils pli blers lecturs. Il pli fitg l'ediziun sin palpiri dal «Blick» cun in minus da 18%. Ella dumbra anc 526’000 lecturs.La NZZ dumbra anc 248'000 lecturs, quai correspunda ad in minus da 8%.
Legida il pli savens vegn anc adina la gasetta gratuita «20 minutas». Malgrà perditas da 7,1% vegn ella legida da 1,36 milliuns persunas en la Svizra tudestga. Las cifras da las gasettas regiunalas èn restadas stabilas.
RR novitads 06:00