Siglir tar il cuntegn

Header

Ina media vi da la lavur.
Legenda: Dapli dunnas en la medischina: il trend dals davos onns cuntinuescha. Keystone
cuntegn

Svizra Adina dapli medias che medis en Svizra

Il trend cuntinuescha: la cumpart da las dunnas vi dal dumber da medis en Svizra crescha vinavant. Gia uss datti dapli medias che medis tar ils professiunals sut 40 onns. Plinavant s’augmenta cuntinuadamain la cumpart da medis cun in diplom da l’exteriur.

La cumpart da las dunnas vi dal dumber da medis en Svizra crescha vinavant. En tut pratitgavan la fin da l'onn 35’325 medias en Svizra, quai mussa la statistica actuala da la Federaziun dals medis svizzers. Quai èn 2,8 pertschient dapli che l'onn 2014.

In terz dapli dunnas ils ultims tschintg onns

Per ina gronda part da l'augment dal dumber da medis en Svizra procuran las dunnas. Tranter il 2010 ed il 2015 è la cumpart da las dunnas creschida per bunamain in terz. La cumpart dals umens percunter è s’augmentada per bun otg pertschient.

Dapli dunnas fan studi da medischina

Quest trend sa mussa er en la structura da vegliadetgna dals medis: En la classa sut 40 onns datti dapli medias che medis. A partir dal 40avel onn sa volva lura la relaziun en favur dals umens.

Sch’ins guarda be sin ils diploms da la medischina umana, lura predominescha la cumpart da las dunnas gia dapi 10 onns – actualmain cun 55,7 pertschient.

Guardond sin las direcziuns da spezialisaziun è la cumpart da las dunnas la pli auta tar la psichiatria d’uffants e giuvenils, tar la medischina d’uffants e giuvenils sco er tar la ginecologia e tar l’agid da naschientschas – quai cun mintgamai 60 pertschient.

Differenzas tranter citad e champagna

Plinavant demussa la statistica grondas differenzas tranter citad e champagna quai che pertutga la spessezza da medis. Ils chantuns cun las pli autas spessezzas da medis pro milli abitants èn tuts citadins: Basilea-Citad, Genevra e Turitg.

Questas differenzas èn er da constatar sin nivel da vischnancas. Era là datti dapli medis en citads che en regiuns ruralas.

Blers medis ord la Germania

Bunamain in terz da las medias e dals medis che pratitgeschan en Svizra èn oriunds da l’exteriur. La gronda part dal persunal professiunal deriva dals pajais vischinants, e la pli gronda gruppa vegn da la Germania.

Tenor la Federaziun dals medis svizzer mussan questas cifras, ch’il provediment medicinal en Svizra po mo vegnir mantegnì grazia a l’immigraziun da medias e medis da l’exteriur. Plinavant pledescha la federaziun per in augment dals plazs da studi da medischina. Be uschia possia il provediment vegnir garantì en il futur.

RR novitads 10:00

sda/alb

Artitgels legì il pli savens

Nach links scrollen Nach rechts scrollen