Trais da quatter persunas en Svizra han cumprà l'onn passà almain ina giada insatge en l'internet – quai correspunda a 4,9 milliuns persunas. Avant set onns cumprava anc mo mintga segunda persuna rauba u servetschs online. I dat ina gronda differenza tranter las vegliadetgnas: Da las persunas tranter 25 e 34 onns cumpran passa 9 da 10 mintgatant insatge en l'internet – da las sur 75 onns èsi main che 2 da 10.
Bigliets da viadi e pernottaziuns èn il hit
Il pli savens cumpran Svizzers bigliets da tren e tickets da sgols en l'internet – quai han gia dus terzs dals consuments fatg. Er las cumpras da vestgadira u stgarpas, pernottaziuns da vacanzas sco er bigliets per occurenzas vegnan adina pli savens fatgas via internet. Pli pauc savens cumprà online vegnan credits, medicaments, servetschs d'investiziuns, lottarias, segiranzas u films.
Mo darar problems pli grevs
Problems tar cumpras online datti tenor rapports da consuments surtut pervi da pitschens disturbis tecnics sin la pagina d'internet u sistems da reclamaziun stentus. Pli grevs problems datti mo darar. Pli pauc che 3% dals consuments èn stads confruntads cun cugliunarias da pajament u da rauba. En cifras totalas èn quai dentant tuttina 120'000 persunas.
RR novitads 11:00