Siglir tar il cuntegn

Header

Navigaziun

Purtret d'ina famiglia, in um, ina dunna en speranza ed in uffants, vid far gentar.
Legenda: En Svizra lavuran adina dapli persunas, dentant lavuran er adina daplirs be parzialmain. Keystone
cuntegn

Svizra Adina dapli Svizzers lavuran parzialmain – pervi da la famiglia

En Svizra è il dumber da persunas che lavuran per paja creschì ils ultims onns. L'onn passà èn passa 84% da la populaziun svizra, tranter 15 e 64 onns, stada activa sin il martgà da lavur. Quai èn stgars 3 puncts procentuals dapli ch'anc il 2010, scriva l'Uffizi federal per statistica.

Dapli che mintga terz Svizzer lavura parzialmain, mussa la statistica. Vinavant mussan las cifras che la differenza tranter dunnas ed umens sa reducescha, quai che pertutga la cumpart ch'è activa sin il martgà da lavur. Il 2018 han 4 da 5 dunnas lavurà, 8,6 puncts procentuals pli pauc che tar ils umens. Il 2010 eran quai anc prest 12 puncts procentuals differenza.

S'adattar a la famiglia

Che las dunnas svizras piglian suenter giascha er vidlonder che bleras mammas na crodan betg pli or da la vita professiunala. Il 2010 han dus terzs da las mammas tranter 25 fin 54 onns cun uffants sut quatter onns lavurà. Il 2018 eran quai gia passa trais quarts.

Tar ils babs na sa reducescha il dumber da quels che lavuran cura ch'i survegnan uffants betg. Dentant datti adina daplirs che reduceschan per la famiglia lur pensum. Tar babs cun uffants sut quatter onns è la quota da pensums parzials creschida per 5,3 puncts procentuals sin 14,1%.

Mammas midan pli savens la lavur

62,2% da las mammas che lavuran e 14,9% dals babs che lavuran cun uffants sut 15 onns a chasa din, ch'els han reducì il pensum pervi da la famiglia. Stgars in quart dals babs e prest in terz da las mammas han midà lur temp da lavur. Mammas midan prest duas giadas uschè savens la plazza da lavur per pudair cumbinar meglier la professiun cun la famiglia.

RR novitads 14:00