Il parlament vul ch'il Cussegl federal fa in monitoring da las annunzias che vegnan inoltradas per las plazzas libras en l'administraziun. Uschia duai vegnir analisà, sch'i manca annunzias, tranter auter da persunas rumantschas, u sche quellas na vegnan betg engaschadas, di il cusseglier dals chantuns Stefan Engler (PCD/GR). Suenter il Cussegl naziunal ha il Cussegl dals chantuns approvà ina tala moziun senza cuntravusch.
Pli autas las posiziuns – main plurilinguitad
En general è l'administraziun federala plurilingua – uschia mussan las cifras dal 2018 che la finamira, da persunas da lingua taliana è stgars cuntanschida e quella da persunas da lingua franzosa era. Mo il Rumantsch è stgars sutrepreschentà cun 0,.4% empè dad almain 0,5%. Uschia mussan las cifras dal 2018 che da var 34’300 collavuraturas e collavuraturs discurran gist bundant 140 persunas rumantsch en l'administraziun.
Linguas en l'administraziun federala (stan 2018)
| Lingua | finamira | stan |
|---|---|---|
| Rumantsch | 0,5-1% | 0,4% |
| Talian | 6,5-8,5% | 6,6% |
| Franzos | 21,5-23,5% | 22,1% |
| Tudestg | 68,5-70,5% | 70,8% |
Era sche la finamira rumantscha na saja betg cuntanschida saja il purtret general tant enavant en urden. Dentant pli fitg ch'ins va en il detagl ves'ins che l'administraziun vegn main plurilingua uschia di Nicoletta Mariolini, la delegada da la Confederaziun per la plurilinguitad.
En las funcziuns clav datti main plurilinguitad.
Nicoletta Mariolini di, che pli autas che las plazzas èn en la ierarchia e pli bain che quellas èn pajadas – main plurilinguitad ch'è avant maun. Uss èsi la dumonda sch'i manca annunzias da persunas da betg lingua tudestga u sche las linguas na survegnan betg avunda pais da la Confederaziun. Perquai duai il monitoring dar scleriment.