Siglir tar il cuntegn

Svizra Adolf Muschg survegn il premi Hermann Hesse

Per ses dialog intercultural survegn il scriptur Adolf Muschg il premi Hermann Hesse. Il premi che vegn surdà per l’emprima giada less promover la discussiun sur da l’ovra da Hermann Hesse.

Ins vesa ina fotografia dil scriptur Adolf Muschg.
Legenda: Adolf Muschg. Keystone

Il scriptur svizzer Adolf Muschg vegn undrà cun il premi da la societad internaziunala Hermann Hesse per ses merits per il dialog intercultural e sia occupaziun cun l’ovra dil scriptur Hermann Hesse. Quai ha declerà quest mardi il manader da fatschenta da la societad, Hans-Martin Dittus.

Il premi dotà cun 10’000 Euro vegn surdà ils 13 da matg a Calw. Adolf Muschg che vegn gest quai di 83 onns haja planisà da prender encunter sez il premi.

Il scriptur Muschg è era enconuschent sco scienzà da litteratura e vala sco expert ed admiratur da Hesse.

Ins vesa ina fotografia da Hermann Hesse pendì si en il museum Hermann Hesse a Montagnola e davant sin maisa ina maschina da scriver dal scriptur.
Legenda: Purtret da Hermann Hesse fotografà el Museum Hermann Hesse a Montagnola. Keystone

Promover la discussiun sur da l’ovra da Hermann Hesse

Il scriptur e titular dal Premi Nobel Hermann Hesse è naschì 1877 a Calw en Germania e mort 1962 a Montagnola en Svizra. Sias ovras principalas èn tranter auter «Siddhartha» ubain «Der Steppenwolf».

Il nov premi less promover la discussiun sur da l’ovra da Hermann Hesse e vegn surdà mintga dus onns alternant cun il premi da la Fundaziun Hermann Hesse a Calw.

RR novitads 15:00