La Confederaziun ed ils chantuns sustegnan persunas da la Sri Lanka ch'èn vegnidas adoptadas ils onns 1970 enfin 1990 da pèrs svizzers tar la tschertga da lur derivanza. A Berna ha la cussegliera federala Karin Keller-Sutter ensemen cun represchentants dals chantuns ed dad in'organisaziun da pertutgads signà ina cunvegna correspundenta.
Concret sustegnan la Confederaziun ed ils chantuns persunas pertutgadas cun infurmaziuns davart las pussaivladads da retschertgar l'atgna derivanza ed las proceduras e cumpetenzas da las autoritads. Ultra da quai duain las persunas adoptadas survegnir sustegn tar la tschertga e la dumonda d’invista en actas en Svizra sco era en la Sri Lanka. En quai connex sustegnan Confederaziun e chantuns l'organisaziun «Back to the roots» cun fin 750'000 francs enfin la fin dal 2024.
Almain 900 adopziuns illegalas
Avant dus onns è in rapport vegnì a la conclusiun che la Confederaziun ed ils chantuns n’hajan betg fatg lur lavur ed hajan guardà davent a moda sistematica tar l'adopziun illegala da circa 900 uffants da la Sri Lanka la fin da l’ultim tschientaner. Il mument vegn elavurà in segund rapport che duai prender sut la marella l'agir da l'administraziun federala e chantunala tar adopziuns ord diesch ulteriurs pajais.
