Siglir tar il cuntegn

Svizra Adversaris da No Billag han il nas davant

Ils adversaris da l'iniziativa No Billag han il nas davant. En ina retschertga da Tamedia han 56% dals dumandads inditgà da dir «na» a l'iniziativa. 36% dals participants vulan abolir las taxas da radio e televisiun. I vegn er betg a dar in cumbat tranter generaziuns.

Microfon.
Legenda: 56% dals dumandads vulan mantegnair las taxas da radio e televisiun. (maletg simbolic) Keystone

En las retschertgas enfin uss era in «gea» il tenor tar l'iniziativa No Billag. Uschia eran l'entschatta da december 57% dals dumandads s'exprimids per l'aboliziun da las taxas da radio e televisiun e mo 34% vulevan mantegnair ellas.

Maioritad encunter – en tut las generaziuns

Ussa, bun in mais e mez avant la votaziun, èsi il cas cuntrari: Ils adversaris da la No Billag han il nas davant. En ina retschertga da la Tamedia han 56% dals dumandads inditgà d'esser cleramain cunter l'iniziativa. L'opiniun cuntraria, da votar cun in cler «gea», represchentan 36% dals participants. 7% èn anc malsegirs: 3% schessan plitost «na» e 4% plitost «gea». 1% n'ha betg respundì a la dumonda.

Plinavant mussa il studi ch'i vegn betg a dar in cumbat tranter las generaziuns: Uschia è in «na» tar l'iniziativa il tenor en tut las gruppas da veglidetgna.

Purschida mediocra cunter diversitad periclitada

L'argument principal (28%) per abolir las taxas da radio e televisiun è che la SRG saja in coloss che produceschia ina purschida da qualitad mediocra – tiers la gronda summa da daners ch'els survegnan mintg'onn. Per blers adversaris da l'iniziativa (32%) patiss la diversitad da medias senza ils daners. E las medias daventassan pli dependentas d'investiders privats.

PPS per, pensiunads cunter

La pli gronda cumpart dals aderents da l'iniziativa fan votants da la Partida populara svizra (PPS) cun 73% e la pli pitschna cumpart fan votants da la Partida socialdemocratica (PS) cun 17%. L'iniziativa chatta er pli tgunsch sustegn en la Svizra tudestga ch'en la Svizra franzosa. E cunzunt umens vulan abolir las taxas da radio e televisiun.

La pli gronda opposiziun da l'iniziativa han ins examinà en la gruppa da persunas sur 65 onns.

RR novitads 07:00

Rom da retschertga

En sia retschertga ha Tamedia dumandà 15'197 persunas da l'entira Svizra:

- 10'681 da la Svizra tudestga

- 3636 da la Svizra romanda

- 880 dal Tessin