Siglir tar il cuntegn

Header

cuntegn

Affera AutoDaPosta Confederaziun porta plant cunter 6 anteriurs commembers da cader

En l'affera d'auto da posta porta la Confederaziun plant cunter 6 anteriurs commembers da cader. Tenor ina communicaziun dal Fedpol, l'Uffizi federal da polizia, vegn renfatschà ad els fraud da prestaziun.

  • 6 anteriurs commemers da cader da l'AutoDaPosta ston sa responsar davant dretgira.
  • Per il cas èn relevantas las datas a partir dal 2014. Quai ch'è capità fin il 2013 è gia surannà.
  • Ord vista finanziala è il cas serrà giu: L'AutoDaPosta SA ha pajà enavos total subvenziuns da 205 milliuns francs a Confederaziun, chantuns e vischnancas (20,9 milliuns ha survegnì il Grischun)

Sur plirs onns hajan l'anteriur schef da finanzas da la Posta, il CEO, il schef da finanzas, il schef dal martgà ed ils manaders dals martgads ost e vest da l'AutoDaPosta inditgà a l'Uffizi federal da traffic falladas cifras davart ils gudogns effectivs.

Tranter auter èn accusads:

  • Pascal Koradi, l'anteriur schef da finanzas dal concern da la Posta
  • Daniel Landolf, l'anteriur CEO da l'AutoDaPosta

Chasti maximal da 5 onns praschun

Fedpol valitescha las acziuns dals involvids sco gravantas. Perquai pretenda Fedpol chastis da praschun per ils accusads. Tar fraud da prestaziun smanatschan a lezs en cas d'ina sentenzia fin a 30'000 francs chasti ed er in chasti da praschun da fin a 5 onns. Las investigaziuns hajan cuzzà pli ditg che pensà. Il grond mantun da datas saja stà ina gronda sfida. Fedpol ha analisà 25 milliuns datas e fatg 70 interrogaziuns.

Per part surannà

L'affera da l'AutoDaPosta SA era vegnida scuvrida l'atun 2017 durant ina revisiun. Là ha l'Uffizi federal per traffic scuvert che l'AutoDaPosta haja svià dapi il 2007 gudogns dal traffic public regiunal sin auters champs da fatschenta.

Pervi da las datas da surannaziun dal dretg administrativ èn oz anc relevantas las acziuns a partir dal 2014. Per quellas vala ina data da surannaziun da 10 onns. Ellas suranneschan pia pir l'onn 2024. Per acziuns commessas fin il 2013 èsi memia tard. Quellas han ina data da surannaziun da set onns ed èn pia gia surannadas.

AutoDaPosta paja enavos

Ord vista finanziala è il scandal gia rugalà. AutoDaPosta Svizra ha pajà enavos a Confederaziun e chantuns sco era a las vischnancas total 205 milliuns francs da las subvenziuns obtegnidas cun cugliunar. Suenter la scuverta dal cas han tut ils commembers da la direcziun stuì rumir lur posts.

L'entschatta november 2018 ha Christian Plüss surpiglià il post da schef. El ha installà ina nova crew da direcziun, nua che tut ils commembers han stuì s'annunziar da nov. Ad interim aveva Thomas Baur manà l'interpresa dapi il favrer 2018.

Pascal Konradi è stà schef da finanzas da l'AutoDaPosta dal 2012 fin il 2016. Suenter è el daventà il president da la direcziun da la Banca chantunala da l'Argovia. Da quest post era Konradi lura sa retratg il zercladur 2018, per proteger la reputaziun da la banca.

Ord l'archiv:

video
Il Grischun survegn passa 20 milliuns da la AutoDaPosta SA
Or da Telesguard dals 21.09.2018.
laschar ir. Durada: 2 minutas 28 Secundas.

RTR novitads 11:00

Artitgels legids il pli savens