Siglir tar il cuntegn

Header

video
Il Grischun survegn passa 20 milliuns da la AutoDaPosta SA
Or da Telesguard dals 21.09.2018.
laschar ir. Durada: 2 minutas 28 Secundas.
cuntegn

Affera AutoDaPosta SA 20,9 milliuns francs debitescha l’AutoDaPosta SA al Grischun

L'affera da l'AutoDaPosta SA vegn pli e pli chara per La Posta. Pervi da las cudeschaziuns illegalas haja ella da pajar enavos 205,3 milliuns francs – sulet al chantun Grischun 20,9 milliuns. Quai han ils responsabels confessà il venderdi ad ina conferenza da medias.

L’affera enturn las cudeschaziuns illegalas da l’AutoDaPosta SA sa sviluppescha ad in debachel naziunal. En ina conferenza da medias il venderdi han ils responsabels da La Posta stuì conceder che l’AutoDaPosta SA ha pretendì 205,3 milliuns francs memia bler dals chantuns svizzers e da la Confederaziun.

Jau era surstà da las dimensiuns e la moda e maniera co AutoDaPosta ha lavurà cun trics per zuppar ils vairs custs.
Autur: Mario Cavigellicusseglier guvernativ

Ensemen cun l'Uffizi federal da traffic e la conferenza dals directurs chantunals da traffic public èsi vegnì fixà ina summa da 188,1 milliuns francs per la perioda dal 2007 fin il 2018. Per ils onns avant il 2007 paja l’AutoDaPosta SA enavos voluntariamain ulteriurs 17,2 milliuns francs. A tgi che la summa dad avant il 2007 vegn repartì sto anc vegnir sclerì.

Milliuns per chantun Grischun e vischnancas

Per il chantun Grischun datti total 15,2 milliuns, sco ch'il Departament da construcziun, traffic e selvicultura dal Grischun scriva il venderdi suentermezdi en ina communicaziun a las medias. Plinavant survegnan era radund 25 vischnancas e regiuns grischunas pajà enavos en tut 5,7 milliuns francs.

Intginas vischnancas grischunas che han dabun daners da l'AutoDaPosta SA

Tavau
1'320'335
Claustra-Serneus1'215'528
Flem753'178
Samignun471'475
Vaz463'169
Laax372'280
Scuol271'925
Falera130'233
Surses105'468
Lumnezia68'131
Tumein66'698
Mustér65'081

AutoDaPosta SA: Summa da restituziun als chantuns, cun tschains

Grischun20'923'272.25
Argovia
14'887'659.10
Tessin14'805'271.30
Turitg
12'642'619.75
Berna9'996'215.50
Son Gagl
6'224'061.55
Vallais3'758'136.30
Soloturn
3'586'265.85
Basilea-Champagna2'193'134.45
Vad2'103'531.25
Turgovia1'666'274.20
Lucerna1'610'579.15
Appenzell Dadora
1'248'470.25
Friburg884'214.80
Neuschatel781'842.35
Jura627'459.75
Sviz491'330.35
Uri
382'918.00
Sutsilvania232'875.85
Schaffusa103'130.20
Glaruna95'968.20
Zug85'290.65
Appenzell Dadens
58'640.70
Sursilvania13'077.80


Cumpart Confederaziun
88'672'530.15
Cumpart chantuns
99'402'239.55
Total restituziun cun tschains
188'074'769.70

Funtauna: Uffizi federal da traffic

Ils chantuns Basilea-Citad e Genevra n'empostan naginas prestaziuns da la AutoDaPosta SA e n'èn perquai betg menziunads.

RR novitads 14:00

Artitgels legids il pli savens