Siglir tar il cuntegn

Header

cuntegn

Affera AutoDaPosta Sbagls en la procedura pudessan laschar surannar tscherts delicts

Ch'i vegnia ad esser ina detga sfida da lavurar si il scandal han ins pudì sminar gia il favrer 2018, curt suenter che las fatschentas dubiusas da la direcziun da l'AutoDaPosta SA èn vegnidas a la glisch. Ni la procura publica da Berna nu la procura publica federala vulevan surprender il cas. Uschia ch'il Cussegl federal ha incumbensà il FedPol, l'Uffizi federal da polizia, d'intercurir il scandal e rimnar mussaments e far interrogaziuns.

Per accelerar la lavur han ins perfin engaschà dus experts externs ch'han manà la procedura. Ma gist quella decisiun procura uss che l'entira lavur da quels dus experts è stada per il chanaster da palpiri. Gia avant dus onns aveva la dretgira penala economica da Berna decidì da refusar il cas pervia da grevs sbagls en la procedura. L'argumentaziun: L'administraziun federala, e tar quella tutga la FedPol, na dastgia tar in cas sco quel da l'AutoDaPosta SA betg incumbensar persunas externas cun la procedura.

Privel che tscherts delicts pudessan surannar

Cunter quella decisiun ha il FedPol fatg recurs al Tribunal federal e lez ha uss decidì da refusar il plant. Adumbatten ha il FedPol argumentà che, sch'ins stoppia uss anc ina giada cumenzar cun l'inquisiziun, avess quai consequenzas gravantas per la rimnada da mussaments. Ils dus experts externs avevan numnadamain gia intercurì ina massa actas e manà circa 70 interrogaziuns cun persunas involvadas en il scandal. Sche quellas stoppian ussa vegnir repetidas possian ils accusads reveder lur decleranzas e tscherts delicts savessen surannar ed uschia betg pli vegnir persequitads. Quai vesa il Tribunal federal dentant in zic auter: I saja pussaivel da terminar la procedura anc avant ch'il delicts scadan. Il FedPol haja uss anc dus onns temp.

audio
Cas AutoDaPosta – anc nagina decisiun definitiva
aus Actualitad vom 12.05.2022.
abspielen. Laufzeit 2 minutas 50 Sekunden.

Sin dumonda na vuleva il FedPol betg commentar la decisiun da Losanna. Ins saja vi d'analisar la sentenzia. Lur finamira saja dentant vinavant da pudair purtar il cas avant dretgira. Els hajan perquai gia suenter la decisiun da la dretgira penala economica da Berna d'incumbensar ina nova gruppa, quella giada persunas internas, da manar a moda parallela la procedura penala administrativa. Quellas lavurs cuntinueschian. L'entira chaussa laschia dentant enavos in gust amar. Quater onns suenter ch'il scadal è vegnì a la glisch n'è perquai anc adina betg cler sche las persunas accusadas ston propi dar pled e fatg avant dretgira.

RTR actualitad 12:00

Artitgels legids il pli savens

Scrollar a sanestra Scrollar a dretga