Siglir tar il cuntegn

Header

cuntegn

Affera bastiments da mar Parmelin avra inquisiziun

Il minister d’economia Guy Parmelin ha instradà in’examinaziun administrativa davart ils bastiments d’auta mar. Quai ha communitgà ses Departament federal. En il focus stat la direcziun da l'Uffizi federal per il provediment economic dal pajais.

L'investigaziun stat en connex cun la perdita da plirs milliuns francs tar las concessiuns da garanzias per ils bastiments sut bandiera svizra e la critica da la cumissiun da gestiun envers il departament.

Incumbensà per l'examinaziun è Cornel Borbély che duai examinar concretamain la collavuraziun, la repartiziun da las incumbensas e la responsabladad tranter las differentas partidas. Sco ulteriur punct d'inquisiziun ha Parmelin definì il management da ristgs e singuls process per surventscher situaziuns d'urgenza e manglaments.

Gia in donn da 300 milliuns francs

Las garanzias per ils bastiments d'auta mar svizzers vegnan charas. Pir il december ha il parlament approvà in ulteriur credit supplementar. Il donn fin uss munta a 300 milliuns francs.

Che la Confederaziun ha insumma da dar garanzias a bastiments d'auta mar ha motivs istorics. Suenter che la segunda guerra mundiala è rut or hai dà stretgas dal provediment. Per garantir il provediment ha la Confederaziun duvrà bastiments cun bandiera svizra sin las mars mundialas.

Sutvalità ils ristgs

Entant è sa sminuida la muntada da bastiments en situaziuns da crisa. Ditg ha il Cussegl federal giuditgà il ristg per garanzias sco pitschen. En connex cun la crisa da finanzas il 2008 è la nautica d'auta mar dentant vegnida en la crisa. La fin dal 2016 aveva la Svizra 47 bastiments d'auta mar cun garanzias per totalmain 794 milliuns francs. L'atun passà era quai anc 26 bastiments cun garanzias da 500 milliuns francs.

RTR novitads 11:00

Artitgels legids il pli savens