Siglir tar il cuntegn

Header

Navigaziun

cuntegn

Svizra Affera da cartel era en il chantun Berna

La WEKO intercurescha sche dus producents d'asfalt han fatg cunvegnas da territori ed èn vegnids d'accord da betg concurrenzar in l'auter.

Via rutta e maschinas da bajegiar da la vart.
Legenda: Maletg simbolic: La cumissiun da concurrenza Weko ha inoltrà ina inquisiziun cunter duas firmas da cuvrida. Keystone

Uss ha era il chantun da Berna sia affera da concurrenza. Il mardi ha la cumissiun da concurrenza (WEKO) communitgà, ch’ella intercureschia sche dus producents d’asfalt e lur acziunaris hajan fatg cunvegnas da territori e sajan s’accordads da betg concurrenzar in l’auter. La WEKO ha gia visità pliras interpresas per tschertgar e confiscar cumprovas.

I dettia indizis che in dals producents d’asfalt possedia ina posiziun dominanta sin il martgà e ch’el haja malduvrà sia posiziun, stat scrit en la communicaziun. Concret datti suspects ch’il producent haja favurisà ses agens acziunaris e lià sia clientella a lunga vista sin donn e cust dad auters producents d’asfalt.

Cas pendents en Grischun

Era dus cas da submissiun dal Grischun èn anc pendents tar la WEKO, ha confermà il vicedirectur da la WEKO, Frank Stüssi, sin dumonda da l’ANR. In da quests cas pertutga la construcziun da vias en l’entir Grischun. Cun ina decisiun da la WEKO saja da quintar questa stad, uschia Stüssi.

RR novitads 12:00