En l'affera dal Kasachstan avra la Procura publica federala uss er ina procedura cunter il lobist ed anteriur ambassadur Thomas Borer. Ad el vegn renfatschà corrupziun e d'avair concedì in avantatg rapporta la SDA citond la Procura publica federala.
Gia la bun'ura aveva l'affera dal Kasachstan procura per lingias grassas:
Per l'emprima giada perda in parlamentari l'immunitad
Cun 5:3 vuschs aveva la cumissiun d'immunitad dal Cussegl naziunal decis la bun'ura da retrair l'immunitad a l'anteriur cusseglier naziunal Christian Miesch da la PPS. Quai aveva communitgà la presidenta da la cumissiun Mattea Meyer (PS/ZH). Uschia po la Procura publica federala tant investigar cunter Miesch sco er prender en mira a Thomas Borer.
Anc il zercladur aveva la cumissiun refusà da retrair l'immunitad parlamentara da Miesch. Uss ha ella però midà opiniun e suonda uschia a la cumissiun dal Cussegl dals chantuns. Lezza era s'exprimida l'avust da retrair l'immunitad dal politicher.
L'affera dal Kasachstan: GA d'emprima classa en il focus
En l'uschenumnada affera dal Kasachstan duai Miesch avair mess en quint al secretari da la Gruppa Svizra-Kasachstan, apunta a Thomas Borer, in abunament general d'emprima classa per 4'635 francs – quai malgrà ch’el aveva sco cusseglier naziunal quella giada gia in tal GA.
La Procura publica federala suppona, che Miesch haja prendì encunter uschia raps per avair inoltrà in’interprellaziun. Perquai al vegn renfatschà corrupziun passiva.
RR novitads 09:00/16:00