Siglir tar il cuntegn
Inhalt

Affera Maudet Vinavant en il focus – Pierre Maudet ha pers l'immunitad

In settember nair per Pierre Maudet – in onn suenter ch’el steva a la sava per il Cussegl federal perda il cusseglier guvernativ genevrin ed anteriur shooting-star politic si'immunitad parlamentara. Quai rapportan las agenturas da novitads.

Maudet en profil.
Legenda: Sut suspect – Maudet duai avair acceptà avantatgs tar in viadi en ils Emirats Arabs Unids l'onn 2015. Keystone

Cun la decisiun dal parlament genevrin po la procura publica prender l'uschenumnada affera Abu Dhabi anc pli fitg sut la marella. Uss sa ella far ina audiziun cun il cusseglier guvernativ Pierre Maudet (PLD). La procura publica aveva instradà l'inquisiziun gia l'avust.

La procura publica da Genevra renfatscha al politicher d'avair profità d'in viadi ad Abu Dhabi. Maudet ha dà tiers ch'el haja ditg manzegnas davart la finanziaziun da quest viadi. Ils custs duai il prinzi ereditar d'Abu Dhabi avair surpiglià.

L’affera Maudet aveva survegnì nov fieu cur che retschertgas da la «Rundschau» han mussà ch'ils organisaturs dal viadi da Maudet èn involvids en in grond project da fabrica a Genevra.

Maudet resta president

Pierre Maudet resta president da la conferenza dals directurs chantunals da giustia e polizia, quai malgrà che la procura publica investighescha cunter el pervi d'in viadi dispitaivel. Maudet haja orientà la suprastanza da la conferenza davart sia decisiun sco er davart ils motivs per la procedura penala. La suprastanza haja decidì da surdar la direcziun da la conferenza durant quest temp ad Urs Hofmann, il directur da segirtad da l'Argovia.

RR novitads 06:00