Tenor quellas retschertgas duain advocats d'ina chanzlia da Genevra ed d'ina firma fiduziaria da Turitg esser involvids. Latiers hajan firmas dubiusas contos tar bancas svizras. Al concern dad Airbus vegn gia dapi in temp renfatschà d'avair fatg fatschentas corruptas. Irregularitads e pajaments zuppads da cumissiun haja dà en divers cas. Per exempel tar la vendita da satellits en il Kasachstan u tar la vendita d'aviuns en Libia.
Perquisiziuns da chasa a Genevra
Er la Svizra è vegnida en il focus da las inquisiziuns internaziunalas. En connex cun las venditas en il Kasachstan ha la Frantscha dumandà la Svizra per agid giudizial. Il schaner 2017 hai lura dà perquisiziuns a Genevra tar in responsabel per l'Organisaziun da service e marketing (SMO). Quai sin fundament d'ina decisiun dal Tribunal federal.
Questa SMO dad Airbus è stada involvida en divers contracts e venditas heiclias. La rolla è stada d'indemnisar intermediaturs che han gidà da purtar contracts. Questa SMO ha lura sviluppà in'entira rait da filialas che han servì sco mir da protecziun per Airbus.
Advocats da Genevra e fiduziaris da Turitg
En il construct han advocats da Genevra tgirà corporaziun en divers lieus, sco las Antillas, Panama e Luxemburg. Quai haja pussibilità ad Airbus da zuppar sia controlla da divers contos dad off-shore. Ils documents mussan er ch'ina firma da fiduziaris turitgaisa è stada involvida. In pajament dubius or da la Svizra ad ina firma ha la finala fatg reagir las autoritads da Genevra.
Airbus e las firmas svizras n'han betg vulì prender posiziun.
RR novitads 06:00